Shymkentte on ailyq sábidiń kúiip qalýyna sebepker bolǵan 2 medbike men aǵa medbike tergeý aiaqtalǵanǵa deiin jumystan shettetildi. Bul týraly búgin qalalyq densaýlyq saqtaý basqarmasy basshynyńyń mindetin atqarýshy Ǵalymjan Ábish málimdedi, dep habarlaidy QazAqparat tilshisi.
Ǵalymjan Ábishtiń aitýynsha, 10 ailyq náreste Shymkent qalalyq juqpaly aýrýlar aýrýhanasyna 25 naýryz kúni túsken. «JRVI ortasha aýyr» diagnozymen aýrýhanaǵa jatqyzylǵan balanyń ishi qatyp qalǵan eken. Anasynyń aitýynsha, balanyń ish qatýyna bailanysty dáriger tazalaý klizmasyn taǵaiyndaǵan.
«Aýrýhana medbikesi 28 naýryz kúni bul protsedýrany júrgizý kezinde sýdyń temperatýrasyn teksermegen. Ol temperatýra 36 gradýs bolý kerek bolsa, balaǵa 50-60 gradýs ystyq sýmen jasalǵan. Saldarynan balany termiialyq kúiik shalǵan. Qazirgi ýaqytta balada 1-2 dárejeli termiialyq kúiik baiqalady jáne teri jamylǵysynyń kúiigi 1% - dan tómen. Balany kombýstiolog, balalar hirýrgy tolyq tekserdi. Diagnozy men jai-kúiin eskere otyryp, tiisti emdeý-diagnostikalyq is-sharalar jasalýda. Qazirgi jaǵdaiy turaqty, qanaǵattanarlyq. Oń dinamikalyq ózgerister bakiqalady. Bala tiisti emin odan ári jalǵastyrý úshin oblystyq balalar aýrýhanasynyń beiindi bólimine aýystyryldy. Balanyń jaǵdaiynda respýblikalyq uiymǵa aýystyrýdy talap etpeidi. Ata-analarmen jáne qyzmetkerlermen túsindirý jumystary júrgiziledi»,- dedi Ǵalymjan Ábish.
Basqarma basshylyǵynyń sózinshe, qazirgi tańda atalǵan fakti boiynsha ishki aýdit komissiiasymen JAA-da qyzmettik tekserý júrgizilgen. Sonymen qatar, Shymkent qalalyq densaýlyq saqtaý basqarmasy ókilderiniń qatysýymen QDSD tarapynan tekserý júrgizilýde. Sol tekserýler qorytyndysy boiynsha arýhananyń meditsina qyzmetkerleri men uiymnyń laýazymdy tulǵalaryna qatysty tiisti sharalar qoldanylady. Juqpaly aýrýlar aýrýhanasynyń bas dárigeri Amangeldi Nurlybaevtyń sózine sensek, aýrýhana balanyń emine qajetti shyǵyndardy kóterýge daiyn.
Eske sala keteiik, shymkenttik aýrýhanalardyń birinde medibikeler 10 ailyq nárestege qainaǵan sýmen klizma jasap, kúiip qalǵan bolatyn. Saldarynan náreste aýrýhananyń jansaqtaý bóliminen bir-aq shyqqan edi. Sondai-aq, densaýlyq saqtaý ministri Eljan Birtanov atalǵan jaǵdaiǵa qatysty pikir bildirdi.
