Shyǵys Qazaqstan oblysynda biylǵy kóktem shyqqaly beri 40 úidiń aýlasyn sý basqan, dep habarlaidy "Ult aqparat".
ShQO TJD bastyǵynyń orynbasary Qanat Ábdilov onlain formatta ótken baspasóz máslihatynda ózenderde sýdyń kóterilgenin aitty. Alaida qaýipti deńgeiden aspaǵan.
«Búginde óńirdiń qar jamylǵan aýmaǵy 19% quraidy. Glýbokoe, Shemonaiha jáne Katonqaraǵai aýdandarynda qar jamylǵysynyń biiktigi 15 sm-den aspaidy. Qutqarýshylar 9 ret aerovizýaldy tekserý júrgizdi. 20 naýryzdan bastap oblysta sý tasqynyna qarsy jedel shtab jumys isteýde. Óńir aýmaǵynda joǵary daiyndyq rejimi engizilip, 2412 tehnika, 377 motopompa jáne 106 evakýatsiialyq pýnkt daiyndaldy», - dedi ol.
Qazirgi ýaqytta Altai jáne Kókpekti aýdandarynda QR TJM 52859 áskeri bóliminiń kúshteri men quraldary sý tasqynyna qarsy is-sharalardy jalǵastyrýda. 7700 metr aryqtar men sý burý kanaldary, 24 sý ótkizý nysandary, qarttar men jalǵyzbasty jandardyń 31 úiiniń aýlasy qardan tazartylǵan. Sondai-aq 3220 dana ydys-qap tóselip, uzyndyǵy 101 metr muz kesildi.
Naýryz aiynan bastap Borodýliha aýdanynyń Orlovka aýylynda 1 turǵyn úidi jáne Novopokrovka, Orlovka aýyldary men Ridder qalasynda 46 turǵyn úidiń aýlasyn sý basty. Sol jerlerden barlyǵy 201 974 tekshe metr sý sorylyp, inertti materialdary bar 10485 danadan astam ydys-qap tóseldi.
