Shortandy kentinde gaz ballony jarylysynan zardap shekken 12 jastaǵy bala kóz jumdy, dep habarlaidy Nur-Sultan qalasy Densaýlyq saqtaý basqarmasynyń baspasóz qyzmeti.
"Ókinishke qarai, Shortandy aýylyndaǵy jarylystan zardap shekken 2009 jylǵy bala 20 qarasha kúni keshke kóz jumdy. Bala elorda aýrýhanasyna óte aýyr hálde jetkizilgen edi. Patsient shuǵyl túrde jansaqtaý bólimine jatqyzyldy. Jetkinshek denesiniń 70%-in kúiik shalǵan. Sondai-aq óte aýyr dárejedegi kúiik shogy baiqaldy", - dep málimdedi basqarmanyń baspasóz qyzmeti.
Barlyq emdeý sharasyna qaramastan dárigerler balany ajaldan arashalap qala almady.
"Senbi, 20 qarashada balanyń júregi toqtap qaldy. Júrgizilgen reanimatsiialyq sharalarǵa qaramastan onyń júregi qaita soqpady. 21:00-de biologiialyq ólim tirkeldi", - dep naqtylady basqarmadaǵylar.
Turǵyn úide gaz ballonnyń jarylýynan taǵy úsh bala zardap shekken edi. Qazir olar Nur-Sultannyń meditsinalyq mekemelerinde jatyr.
"60% termiialyq kúiikpen túsken bir bala jansaqtaý bóliminde hál ústinde jatyr. Taǵy ekeýi ótken aptada beiindi bólimge aýystyryldy. Olar dárigerlerdiń baqylaýynda", - dep málimdedi basqarma.
Balalardyń jaǵdaiy turaqty, nasharlaý baiqalmaidy.
Aita keteiik, Aqmola oblysyndaǵy Shortandy kentinde gaz ballony jarylyp, úsh adam qaitys boldy.
Resmi málimetke sáikes, qaiǵyly oqiǵa 16 qarashada keshki saǵat 21:38-de Shortandy eldi mekeniniń Lineinaia kóshesinde bolǵan. Baraq úlgisinde salynǵan úide gaz jarylyp, arty órtke ulasqan. Tilsiz jaý 350 sharshy metrge sharpyǵan. Jarylys bolǵan páterden 3 adamnyń – bala men eki jas áieldiń máiiti tabyldy. Taǵy on adam zardap shekti.
