Qazaqstandyq Abzal Ájiǵaliev Dordreht qalasynda short-trekten álem kýbogy kezeńinde qola júldeger atandy, dep habarlaidy "Ult aqparat".
Ulttyq olimpiada komiteti málim etkenindei, Abzal 500 metr qashyqtyqta úzdik úshtikke ilikti.
Bul qashyqtyqta ońtústikkoreialyq Se Djýn Lý altyn medaldi jeńip aldy. Belgiialyq Stiin Desmet kúmis júldege ie boldy.
A.Ájiǵaliev ekinshi jartylai finalda márege birinshi bolyp jetip, sońǵy básekege joldama aldy.
Short-trekten Qazaqstan quramasynyń bas bapkeri Mádiǵali Qarsybekov qazirgi kezde komandanyń aldaǵy naýryz aiynyń ortasynda Seýl qalasynda ótetin álem chempionatyna daiyndalyp jatqandyǵyn jetkizdi.
«Biylǵy maýsymda jastardan Nurtilek Qajyǵali, Ádil Ǵaliahmetov, Erkebulan Shamýhanov, Mersaid Jaqsybaevtardy qosyp, shama-sharqyn baiqap jatyrmyz. Burynǵy quramnan Abzal Ájiǵaliev pen Denis Nikisha qaldy. Barlyǵy 8-9 shorttrekshimizdi shyńdaý ústindemiz. Aldaǵy jyly qyrkúiekten bastap tórt birdei álem kýbogy kezeńi ótip, olimpiadaǵa lizentsiialar sarapqa salynady. Maqsat - 2022 jylǵy Beijiń olimpiadasyna qatysý úshin joldamalardy barynsha kóbirek jeńip alý», - dedi QazAqparat tilshisine M.Qarsybekov.
Aita ketsek, Batys Qazaqstan oblysynda týyp-ósken Abzal Ájiǵaliev keiingi jyldary Nur-Sultan qalasynyń atynan el namysyn qorǵap keledi.
