Foto:gov.kz
Bas áskeri prokýratýra byltyr tamyzda "Shóldala" shekara zastavasynda óz-ózine qol jumsaǵan 18 jastaǵy sarbaz Bekbol Mirashtyń ólimine qatysty istiń mán-jaiyn bólisti, dep habarlaidy "Ult aqparat" vedomstvonyń baspasóz qyzmetine silteme jasap.
Vedomstvo málimetinshe, bilikti asyra paidalaný arqyly ózin-ózi óltirýge deiin jetkizý deregi boiynsha sol zastavanyń kelisimshart boiynsha áskeri qyzmetshisi kúdikke ilingen. Qylmystyq is materialdaryna sáikes, ol Bekbol Mirashty jáne onymen birge áskerge shaqyrylǵan basqa da merzimdi áskeri qyzmetkerlerdi júieli túrde psihologiialyq turǵyda qorlap, soqqyǵa jyqqan.
"Kúdikti qamaýǵa alyndy. Tergeý jalǵasyp jatyr jáne erekshe baqylaýda.
Tergeý barysynda bolǵan oqiǵanyń barlyq nusqasy, sonyń ishinde jynystyq zorlyq-zombylyq múmkindigi tekserildi. Alaida bul derek rastalmady.
Advokattyń ótinishhattary belgilengen merzimde qaraldy jáne qylmystyq is júrgizý zańnamasy tártibimen qanaǵattandyryldy. Advokat S. Pralievtiń qylmystyq istiń mán-jaiyn jariialaýǵa qatysty áreketteriniń zańdylyǵyn ýákiletti organ, advokattardyń tártiptik komissiiasy qaraidy.
Qylmystyq-protsestik kodekstiń 201-babyna sáikes jeke ómirge, jeke jáne otbasylyq qupiiaǵa qol suǵylmaýshylyqty eskere otyryp, sotqa deiingi tergep-tekserý jónindegi ózge de aqparat jariia etilmeidi", - delingen habarlamada.
Eske salaiyq, qańtarda sarbazdyń ólimine qatysty qylmystyq istiń egjei-tegjeiin aitqan advokat etikany buzdy dep aiyptalǵan edi.
