Túrkistan oblysynyń ákimi Ómirzaq Shókeev Shornaq aýylynda qurylǵan jedel shtab otyrysyna qatysty. Óńir basshysy oqiǵa bolǵan sátte shuǵyl áreket etip, el tynyshtyǵyn saqtaýda júieli jumys jasaǵan shtab jumysyna alǵysyn aitty, dep habarlaidy "Ult aqparat".
Jiynnan soń aýyl turǵyndarymen kezdesken oblys ákimi keleńsiz jaǵdaiǵa bailanysty pikir bildirdi.
«Shornaq - myńjyldyq tarihy bar meken. Keshe oryn alǵan jaǵdai búkil elge tarap, yńǵaisyz jaǵdai boldy. Yntymaǵy men birligi jarasqan aýyl úshin bul - uiat nárse. Árine, áleýmettik jeliniń damyǵan ýaqytynda bul jaǵdaidy burmalaityn arandatýshylardyń bolary anyq. Tek solardyń sózine ermeý kerek. El arasyna daý, irtki salǵan adamdarǵa qatań jaza qoldanylady. Al, sizder jastar men aǵa býyndy sabyrǵa shaqyryp, birlikterińizdi nyǵaita túsińizder» degen óńir basshysy mundaǵy áleýmettik-ekonomikalyq qajettilikterge basa nazar aýdarylatynyn jetkizdi.
Oblys ákiminiń sózin quptaǵan aýyl aqsaqaldary da óz oilaryn ortaǵa salyp, usynys-pikirlerin jetkizdi.
«Shornaq aýyly osy ýaqytqa deiin daý shyǵarǵan aýyl emes edi. Keshegi oqiǵa barlyǵymyzdy eseńgiretti. Sebebi, áleýmettik jeli arqyly jalǵan aqparat kóp tarady. Osyndai jaǵdaidyń oryn alýyna sebep bolǵan jastar úshin barlyqtaryńyzdan keshirim suraimyz. Biz, qazaq, ózbek - aǵaiyn halyqpyz. Tilimiz, dinimiz bir elmiz»,- dedi aýyl aqsaqaldary.
Sondai-aq, basqosýda oblystyq ózbek etnomádeni birlestiginiń tóraǵasy aýyl turǵyndaryn birlikke, yntymaqqa shaqyrdy.
Eske sala keteiik, buǵan deiin áleýmettik jelide bir top azamat ózderiniń narazylyǵyn bildirgen beinejazba taraǵan bolatyn. Atalǵan oqiǵa Kentaý qalasyna qarasty Shornaq aýylynda bolǵan. Turmystyq janjaldy jergilikti politsiia qyzmetkerleri toqtatqan edi.
Búgin QR Ishki ister ministri Erlan Turǵymbaev Shornaqtaǵy jaǵdai turaqtalyp, 4 adam qamaýǵa alynǵanyn jariia etti.
Keiinnen Memleket basshysy Qasym-Jomart Toqaev Shornaqtaǵy jaǵdai boiynsha oblys basshylyǵy jáne quqyq qorǵaý organdarymen jiyn ótkizip, Ómirzaq Shókeevtiń buzaqylyqty der kezinde tyiǵan tyńǵylyqty jumysyna joǵary baǵa berdi.
20 shilde kúni oryn alǵan oqiǵanyń jai-japsary anyqtalyp, turǵyndar qazirgi tańda úirenshikti ómirge qaityp oralǵan.
