Túrkistan oblysynyń ákimi Ómirzaq Shókeevtiń tóraǵalyǵymen Arys qalasynda qalany qalpyna keltirý jumystaryn júrgizý boiynsha apparattyq jiyn ótti, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
Basqosýǵa elimizdiń barlyq oblystarynan kelgen Arys qalasyndaǵy qurylys jumystaryna jaýapty ókilderi, Túrkistan oblystyq basqarma basshylary men aýdandyq ákimdik mamandary qatysty.
Jiynda Arys qalasyndaǵy turǵyn úiler, áleýmettik nysandar men joldarda júrgizilip jatqan qurylys jumystary men turǵyndarǵa kórsetilip jatqan kómektiń jai-kúii talqylandy. Oblys basshysy barlyq qurylys nysandarynyń der kezinde aiaqtalýyn tapsyryp, qurylys sapasyna basa nazar aýdarý kerektigin qadap aitty.
Basqosýda sóz alǵan qurylysshylar jumysqa kedergi keltirip jatqan birqatar máselelerdi sóz etti.
Olardyń aitýlarynsha, Arystaǵy birneshe úi ieleri saraptaý qorytyndysymen kelispei otyr. Turǵyndar úilerin kúrdeli jóndeýdiń ornyna túgel súrip tastaýdy talap etýde. Mundai azamattarǵa aldyn ala eskertýler jasalǵan. Sondai- aq, qujattardy zańdastyrýǵa qatysty kei qiynshylyqtar da belgilegen merzimnen keshigýge sep bolýda dedi sektor jaýaptylary.
Máselege qanyqqan Ómirzaq Estaiuly barlyq sektor jaýaptylaryna qurylys jumystaryn aiaqtaý merzimin belgilengen kesteden keshiktirmeýdi jáne oryn alǵan kemshilikterdi jeke - jeke qarap, turǵyn úi ieleriniń ótinishterin eskere otyryp sheshýdi tapsyrdy. Jiynda Túrkistan oblysy Qurylys basqarmasy basshysynyń orynbasary Erbol Ahmetov Arys qalasyndaǵy qurylys-jóndeý jumystary jaiynda baiandama jasady.
«Jalpy Arys qalasynda 8637 turǵyn úi nysany ornalasqan. Onyń ishinde: Jeke turǵyn úi - 8534; Kóp qabatty turǵyn úiler - 103. Jóndeýdi qajet etetini – 7 164 nysan. Qalpyna keltirýge jatpaityn - 470 nysandy quraidy. Aǵymdaǵy jyldyń 6 qyrkúiektegi jaǵdaiǵa 7149 – turǵyn jáne kópqabatty úilerde qurylys jumystary aiaqtalyp, onyń ishinde 189 qurylystary ishki árleýsiz aiaqtalǵan. Al, qalǵan 15 nysanda qurylys jumystary júrgizilýde, onyń ishinde 10 nysan boiynsha menshik ieleriniń kelispeýinen qurylys jumystary toqtap tur. Qalpyna keltirý jumystaryna: 144 – qurylys kompaniialary, 4 248 – jumysshylar, 215 – arnaiy tehnikalar tartyldy», - dedi ol.
Arys qalasy boiynsha avtomobil joldaryn jóndeý jumystaryn júrgizý 13 aimaqta josparlanǵan. Búginde jalpy 62 kósheniń 37 kóshesi aiaqtaldy. Qalǵan 25 kóshesinde jumystar júrgizilýde. 16 kóshesinde jaiaý júrginshilerge arnalǵan jol salý jumystary aiaqtalyp, jaryqtandyrý boiynsha jumystar júrgizilýde. Al 6 kóshede jaryqtandyrý jumystary jalǵasýda. Joǵaryda atalǵan kósheler qyrkúiek aiynda tolyq aiaqtalatyn bolady.
Jalpy búgingi kúnge Arys qalasynda 543 kommertsiialyq nysan bar. Onyń ishinde 509 nysanǵa zalal keltirilgen, al 12 nysan tolyǵymen joiylǵan. Arys qalasynda jalpy 68 áleýmettik nysan jóndeýdi qajet etedi. Onyń ishinde 4 jańa qurylys, 64 qalpyna keltirý jumystary júrýde. Bilim berý nysandary – 53, densaýlyq saqtaý – 8, sport nysandary – 4, qoǵamdyq oryndar – 3, Aǵymdaǵy jyldyń 6 qyrkúiektegi jaǵdaiǵa 62 nysannyń qurylys jumystary aiaqtaldy. Qalǵan 6 nysanda qurylys jumystary júrgizilýde.
Jiynnan soń Ómirzaq Shókeev Arys qalasyndaǵy birqatar qurylys nysandaryn aralap shyǵyp, jergilikti turǵyndarmen kezdesti.
