15 qyrkúiekten bastap alǵashqy meditsinalyq-sanitarlyq kómek uiymdaryna erkin tirkelý boiynsha jyl saiynǵy naýqan bastalady. Biyl sheteldik azamattar men eńbek migranttary úshin emhanaǵa tirkelý erejeleri ózgerdi – olarda meditsinalyq saqtandyrý sharty bolýy tiis. Jańa erejeler osy jyldyń 15 tamyzynan bastap kúshine enedi.
«Nur-Sultan qalasy boiynsha Meditsinalyq saqtandyrý qorynyń meditsinalyq qyzmet jetkizýshileriniń arasynda 36 uiym alǵashqy meditsinalyq-sanitariialyq kómek kórsetedi. Olardyń 18-i – memlekettik, qalǵany – jekemenshik klinikalar», - delingen «Áleýmettik meditsinalyq saqtandyrý qory» KEAQ Nur-Sultan qalasy boiynsha filialynyń baspasóz qyzmeti málimetinde.
Meditsinalyq-sanitariialyq alǵashqy kómek kórsetetin meditsinalyq uiymdarǵa tirkelý tártibine ózgerister engizildi. Olar tek sheteldik azamattar men eńbek migranttaryna qatysty.
Jańa qaǵidalarǵa sáikes, eldiń aýmaǵynda ýaqytsha bolatyn nemese baspana izdep júrgen azamattyǵy joq sheteldik adamdardy emhanaǵa tirkeý erikti meditsinalyq saqtandyrý (EMS) shartynyń negizinde jáne onyń qoldanylý merzimi aralyǵynda ǵana júzege asyrylady. Qoldanylý merzimi aiaqtalǵannan keiin olar meditsinalyq uiymnan avtomatty túrde shyǵarylady.
EAEO-ǵa múshe memleketterden kelgen eńbek migranttarynyń mindetti túrde MSAK qyzmetterine erikti meditsinalyq saqtandyrýy bolýy qajet.
Emhanaǵa tirkeýge ótinish erkin nysanda qazaq nemese orys tilinde, jeke basyn kýálandyratyn qujatty nemese sheteldik tólqujatty qosa bere otyryp, usynylady. Ótinish berýshi meditsinalyq uiymǵa jeke ótinish berýi kerek nemese ol úshin erikti meditsinalyq saqtandyrý shartyn jasasqan saqtandyrý uiymynyń ókilderi muny jasaýy kerek. Meditsinalyq uiymdarǵa – áleýmettik meditsinalyq saqtandyrý qorynyń jetkizýshilerine jáne Densaýlyq saqtaý ministrliginiń aqparattyq júielerimen integratsiialanǵan meditsinalyq aqparattyq júieleri bar meditsinalyq uiymdarǵa tirkelýge bolady.
Qazaqstan aýmaǵyna ýaqytsha kelgen sheteldikter men olardyń otbasy músheleri MÁMS júiesinde qazaqstandyq azamattarmen birdei quqyqtardy paidalanady jáne mindetter atqaratyndyǵyn (QR «Mindetti áleýmettik meditsinalyq saqtandyrý týraly»Zańynyń 3 babynyń 2 tarmaǵy) atap ótý mańyzdy.
QR azamattary, qandastar jáne QR aýmaǵynda turaqty turatyn sheteldikter úshin bekitý tártibi ózgerissiz qalady.
Qalai bekitilý kerek?
Birinshi ádis (barlyǵy úshin). Elektrondyq úkimettiń veb-portaly arqyly bekitý www.egov.kz. «Densaýlyq saqtaý» bóliminde «Meditsinalyq-sanitariialyq alǵashqy kómek kórsetetin meditsinalyq uiymǵa tirkelý» qyzmetin tańdaý qajet. Jolaqtardy toltyrý arqyly meditsinalyq uiymǵa ótinish berý kerek. Patsient týraly málimetterdi emhana memlekettik aqparattyq júielerden avtomatty túrde alady. Jaýap oń bolǵan jaǵdaida azamatqa meditsinalyq uiymnyń ETsQ-sy qoiylǵan elektrondyq qujat túrinde bekitilgeni týraly habarlama beriledi.
Ekinshi ádis (halyqtyń jekelegen sanattary úshin). Bekitý emhanaǵa erkin nysandaǵy ótinishpen jáne jeke basyn kýálandyratyn qujatpen tikelei júgingen kezde júrgiziledi. Bul ádis zań boiynsha zeinetkerlerge, múgedekterge, qamqorshylarǵa, patronat tárbieshilerge, koloniialarda jazasyn ótep jatqan sottalǵandarǵa, stýdentterge, merzimdi áskeri qyzmetshilerge, shet memleketterde týylǵan balalarǵa jáne senimhat boiynsha tirkeýdi júzege asyratyn adamdarǵa ǵana qol jetimdi.
Qashan bekitilý kerek?
Qazaqstanda jyl saiyn 15 qyrkúiekten 15 qarashaǵa deiin MSAK meditsinalyq uiymdaryna halyqty erkin tirkeý naýqany júrgiziledi. Meditsinalyq kómekke qol jetkizbei qalmaý úshin tirkelýdiń mártebesin tikelei turǵylyqty jeri boiynsha emhanada nemese elektrondyq úkimet veb-portalynda ETsQ arqyly tekserý usynylady. Tirkeý nemese qaita bekitý kezinde emhanany turǵylyqty jerine jaqyn jerden tańdaý usynylady, qajet bolǵan jaǵdaida ýchaskelik dáriger naýqasqa úige bara alady. Bul ásirese pandemiia kezinde óte mańyzdy.
«Naýqan kezinde MSAK uiymyna bekitile otyryp, azamattar meditsinalyq kómekti 2022 jyldyń 1 qańtarynan bastap ala bastaidy. Iaǵni, osy jyldyń 31 jeltoqsanyna deiin azamattarǵa buryn tirkelgen emhanada qyzmet kórsetiledi», – dep túsindirdi Áleýmettik meditsinalyq saqtandyrý qory.
Tirkeý naýqany Densaýlyq saqtaý sýbektileriniń derekqorynda tirkelgen jáne TMKKK jáne MÁMS boiynsha meditsinalyq qyzmetter kórsetýge úmitker meditsinalyq uiymdar arasynda ǵana júrgiziledi. Tirkelýge qoljetimdi emhanalardyń tizimimen Qordyń www.fms.kz saitynda «Emhanany tańdaý» bóliminde tanysýǵa bolady.
