Ákimshilik politsiia komiteti tóraǵasynyń orynbasary Serik Túsipov shetelden ákelingen kólikti nege senimhatpen, saqtandyrý qujattary arqyly satyp alýǵa bolmaitynyn túsindirdi, dep habarlaidy QazAqparat.
«Avtomobildi senim hat nemese saqtandyrý qujaty arqyly satyp alýdyń da táýekelderi bar. Eger kóliktiń iesi sheteldik bolsa, kólik salyǵynan jaltarý úshin kez kelgen ýaqytta óz elinde tirkeýden alǵyzyp tastaýy múmkin. Osylaisha Qazaqstandaǵy iesi táýekelge tap bolady. Jol apaty bolǵan jaǵdaida saqtandyrý kompaniialary kelgen shyǵyndy aqshalai óteýden bas tarta alady», - dedi ol vedomstvonyń aqparat alańynda ótken onlain brifingide.
Onyń málimeti boiynsha, qazan aiynan beri elimizdiń 3 qalasynda osyndai problemasy bar 30 kólik anyqtalǵan.
«Petropavl, Óskemen, Semei qalalarynda dál osy táýekel boiynsha tekserý júrgizdik. Senimhatpen nemese saqtandyrý qujattary arqyly satylǵan 30-ǵa jýyq kólik bar bolyp shyqty. Túiindesek, senimhatpen nemese saqtandyrý qujattary arqyly kólik satyp alý azamattarymyzdy táýekelge tap keltiredi. Sondyqtan Ishki ister ministrligi qazaqstandyqtarǵa sheteldik tirkeýi bar kólik satyp alǵan kezde atalǵan táýekelderdi eskerip, kelisimniń bárin qatań túrde Qazaqstan zańnamasynyń aiasynda rásimdeý qajettigi eskertedi», - dedi Serik Túsipov.
