Úkimet otyrysynda Ulttyq sanaqqa daiyndyq barysyn baiandaǵan Ulttyq statistika biýrosynyń basshysy Nurbolat Aidapkelov sheteldegi otanlasrymyz da sanaqtan tys qalmaitynyn aitty, dep habarlaidy QazAqparat.
«Turaqty turǵyndar, elimizdiń azamattary, sheteldikter jáne azamattyǵy joq adamdar sanaqtan ótedi. Sondai-aq qyzmettik mindetterin oryndaýmen bailanysty shetelge júrgen bizdiń azamattar, «Bolashaq» baǵdarlamasy jáne stýdent almasý baǵdarlamalary boiynsha oqityn stýdentter, shetelge demalysqa, emdelýge nemese qonaqqa ketken týrister de sanaqtan ótedi. Qazaqstan Respýblikasyna turaqty turýǵa kelgen nemese pana izdegen qonys aýdarýshylar, sondai-aq 12 aidan az, ýaqytsha elde júrgen sheteldikter de sanaqqa alynady», - dedi ol.
Onyń aitýyna qaraǵanda, Ulttyq statistika biýrosy barlyq múddeli memlekettik organdarmen, jergilikti ákimdiktermen halyq sanaǵyn ótkizý kezinde birlesip áreket etý boiynsha birlesken buiryqtar qabyldaǵan. Dál osyndai birlesken buiryq Syrtqy ister ministrligin de bekitilipti.
«Biýro sheteldegi azamattarymyzdyń sanaǵyn ótkizýdi uiymdastyrý maqsatynda QR SIM-men ózara is-qimyl tártibi týraly birlesken buiryqtardy bekitti», - dedi Ulttyq statistika biýrosynyń basshysy.
Eske salsaq, búgingi Úkimet otyrysynda QR Premer-Ministri Asqar Mamin Úkimet otyrysynda ulttyq sanaqqa sylbyr daiyndalyp jatqan óńirlerdi atady.
«Jalpy sanaq ótkiziletin ýaqytta 32 myń adam jumysqa alynady. Almaty jáne Nur-Sultan qalalarynyń, Qostanai jáne Shyǵys Qazaqstan oblystarynyń ákimdikteri jumysty durys jolǵa qoiǵan. Al Mańǵystaý, Aqtóbe oblystary men Shymkent qalasy ákimdikteriniń jumys qarqyny jetkiliksiz. Óńirlerdiń ákimderi halyq sanaǵyna daiyndyq barysyn jeke baqylaýǵa alsyn», - dedi Asqar Mamin.
