2021 jyly shetelde bilim alǵan 11 myńnan astam qazaqstandyq elimizdiń joǵary oqý oryndaryna aýysty. Stýdentterdiń kópshiligi Resei ýniversitetterinen aýysty. Sondai-aq buryn AQSh, Qytai, Frantsiia, Majarstan, Chehiia, Polsha, Túrkiia ýniversitetterinde oqyǵan, biraq Qazaqstanda oqýyn jalǵastyrýǵa sheshim qabyldaǵan stýdentter de bar. Bul týraly BǴM habarlaidy.
«Qysqy jáne jazǵy sessiianyń qorytyndysy boiynsha buryn shetelde bilim alǵan 11 myńnan astam stýdent qazaqstandyq joǵary oqý oryndaryna aýysýǵa niet bildirdi. Olar jeńildetilgen aýysý tártibi boiynsha qabyldanyp, qazir otandyq joǵary oqý oryndarynda bilim alyp jatyr. Máselen, olar Ál-Farabi atyndaǵy Qazaq ulttyq ýniversiteti, Qazaq ulttyq qyzdar pedagogikalyq ýniversiteti, Narhoz ýniversiteti, Q. Sátpaev atyndaǵy QazUTZÝ jáne basqa da joǵary oqý oryndaryna qabyldandy. Ótken jyly sheteldik joǵary oqý oryndarynan 15 myńǵa jýyq stýdent bizdiń ýniversitetimizge aýysty», – dedi QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
Aita keteiik, stýdentter sanynyń artýyna bailanysty jańa jataqhanalardy salý jáne bar jataqhanalardy rekonstrýktsiialaý qarqynyn jedeldetý úshin tetikter ázirlendi. Osy jyldyń sońyna deiin elimizde 37 jańa stýdenttik jataqhana paidalanýǵa beriledi.
