Endigi ýaqytta shetel azamattary Qazaqstanda ýaqytsha turýǵa ruqsat alý jáne viza ázirleýdi elimizdiń kez kelgen halyqqa qyzmet kórsetý ortalyǵynan ala alady. Atalǵan qyzmet jyl sońyna deiin barlyq HQO-da qoljetimdi bolmaq. Bul týraly QR Ishki ister ministriniń orynbasary Sáken Sársenov málim etti, dep habarlaidy QazAqparat.
«Elimizge jylyna shamamen 1,5 million shetel azamaty keledi. Osy oraida, ótken jyldyń 1 qańtarynan bastap biz olarǵa kóshi-qon politsiiasynda ýaqytsha tirkelý talabyn joidyq. Bul elimizge investitsiia tartý men ishki týrizmdi ilgeriletýde oń áserin tigizdi. Búginde sheteldik qonaqtar Qazaqstanǵa kelgeni týraly kóshi-qon politsiiasyna «e-Qonaq» mobildi qosymshasy arqyly habarlaý múmkindigi bar», - dedi Sáken Sársenov OKQ-de ótken baspasóz máslihatynda.
Sondai-aq, ministrdiń orynbasary shetel azamattaryna beriletin vizaǵa qatysty jańashyldyqpen bólisti.
«Nur-Sultan jáne Almaty qalasynyń halyqqa qyzmet kórsetý ortalyqtarynda shetel azamattaryna ýaqytsha turýǵa ruqsat berý jáne viza ázirleý úshin biryńǵai qyzmet kórsetý sektory quryldy. Jyl sońyna deiin atalǵan qyzmet túrin elimiz boiynsha barlyq halyqqa qyzmet kórsetý ortalyqtarynda qoljetimdi bolýyn josparlap otyrmyz», - deidi ol.
