Búginnen bastap Túrkiia Qazaqstan azamattarynyń kelýine shekteý engizdi. Bul týraly QR Indýstriia jáne infraqurylymdyq damý ministrligi Azamattyq aviatsiia komitetiniń tóraǵasy Talǵat Lastaev aitty, dep habarlaidy QazAqparat.
«Memlekettik komissiia sheshimimen erteńnen bastap karantindik rejim engiziledi. Azamattyq aviatsiia salasynda búkil ishki reister oryndalady. Eshqandai shekteý joq. Búgingi tańda apta saiyn 45 baǵyt boiynsha 457 reis oryndalady. Olarǵa eshqandai shekteý bolmaidy, jalǵastyra beremiz», - dedi ol Ortalyq kommýnikatsiialar qyzmetindegi brifing barysynda.
Onyń atap ótýinshe, halyqaralyq baǵytta buǵan deiin ashylǵan Túrkiia men Ońtústik Koreiaǵa ǵana reister oryndalady.
«Biraq, keshe biz Túrkiia tarapynan resmi sheshim aldyq. Búginnen bastap Túrkiia bizdiń azamattarymyzdyń óz eline kirýine shekteý engizedi. Sondyqtan Ońtústik Koreiaǵa ǵana áýe reisteri qalady. Jańa reister ashylmaidy», - dedi Talǵat Lastaev.
Komitet basshysynyń aitýynsha, Túrkiiada ýaqytsha turýǵa jáne jumys isteýge ruqsaty bar Qazaqstan azamattary bul elge esh kedergisiz kire alady.
«Osyǵan bailanysty reister búgin deiin áýe kompaniialarymyz Túrkiiaǵa aparǵan jolaýshylardy alyp kelý úshin oryndalady. Áýe kompaniialary tarapynan barlyq mindettemeler tolyq oryndalady», - dedi ol.
