Foto: asker.kz
Ulttyq qaýipsizdik komiteti tóraǵasynyń orynbasary - Shekara qyzmetiniń direktory Erlan Aldajumanov ómir boiyna bas bostandyǵynan aiyrylǵan Vladislav Chelahtyń apelliatsiialyq shaǵymy týraly aitty, - dep habarlaidy Massaget.kz portaly.
Senat kýlýarynda jýrnalister odan 2012 jyly "Arqankergen" beketinde bolǵan oqiǵaǵa qatysty bar shyndyqty aitamyn degen Chelahtyń málimdemesine qatysty pikir bildirýin surady.
"Bul jerde pikir bildirý artyq dep oilaimyn. Oqiǵa bolǵan jyly qylmystyq is qozǵaldy. Sol kezde jaǵdai tolyq anyqtaldy dep oilaimyn. Onyń ne aitqysy keletinin bilmeimin. Qylmystyq is júrdi, tergeý tolyq kólemde ótti, bul nátijeler qisyndy sońyna deiin jetkizildi. Eger málimdemeleri bolsa, soǵan qaraiyq, áńgime ne týraly eken, óitkeni qazir onyń ne aitaryn bilmeimin", - dedi Erlan Aldajumanov.
Onyń aitýynsha, Shekara qyzmetiniń qyzmettik ustanymy tergeý ustanymy men sottyń qorytyndysyna sáikes keledi.
Eske salaiyq, buǵan deiin birqatar BAQ Vladislav Chelah "Arqankergen" beketindegi 15 adamnyń ólimine qatysty jaǵdaidy túsindirýge daiyn ekenin málimdegenin habarlaǵan bolatyn. Chelah 2012 jylǵy mamyrda "Arqankergen" shekara beketinde 14 qyzmettesi men bir ormanshyny óltirdi dep aiyptalǵan bolatyn.
