Sharyn shatqalynda selden zardap shekken eki adam aýrýhanadan shyǵaryldy. Bul týraly Almaty qalalyq qoǵamdyq densaýlyq saqtaý basqarmasy málim etti, dep habarlaidy "Ult aqparat".
Densaýlyq saqtaý basqarmasynyń málimetinshe, Sharyndaǵy selden jaraqat alǵan eki adam Almatydaǵy №4 qalalyq klinikalyq aýrýhanaǵa jetkizilgen.
«Men sol ekskýrsiiada gid boldym. Sharyn shatqalyndaǵy sel kóshkini kezinde 4 oqýshymen birge selde qalyp, jaraqat aldym. Alǵashqyda jaraqat sezinbedi, maǵan balalardy avtobýsqa jinaý, qalǵandaryn tabýǵa kómektesý jáne ata-analarmen kezdesý qajet boldy. Ata-analar balalardy taratyp alyp ketkennen keiin, artymnan ápkem kelgende, men aiaǵymnyń aýyrsynýyn jáne qatty bas ainalýyn sezindim. Bir sátte esimnen tanyp qaldym. Aýrýhanada ózime keldim», - dedi Mádina.
№4 qalalyq klinikalyq aýrýhananyń bas dárigeri Saǵi Beisenbekovtiń aitýynsha, naýqas keshendi tekserýden ótip, em qabyldady.
«Naýqas birden reanimatsiia bólimine jetkizilip, keshendi tekserýden ótti. Ony quramynda travmatolog, terapevt, anesteziolog bar dárigerlerdiń mýltidistsiplinarlyq brigadasy qarady. Beiindi bólimshede tolyq em-sharalardy alyp shyqty», - deidi №4 qalalyq klinikalyq aýrýhananyń bas dárigeri Saǵi Beisenbekov.
Sonymen qatar, atalǵan aýrýhanada №199 mektep-gimnaziiasy muǵalimi em qabyldady. Tótenshe oqiǵa kezinde muǵalim jabyq bas súiek-mi jaraqatyn, mi shaiqalý, deneniń, aiaq-qoldyń kóptegen jaraqatyn aldy.
Oqiǵa bolǵan kúni jedel járdem kóligimen Uiǵyr ortalyq aýdandyq aýrýhanasyna jetkizildi, al 30 mamyrda №4 qalalyq klinikalyq aýrýhanasynyń qabyldaý bólimine óz betinshe júgindi.
«30 mamyrda naýqas beiindi bólimshege jatqyzylyp, meditsinalyq kómektiń tolyq kólemin aldy. Sharyn shatqalynda zardap shekkendermen birge psihologtar jumys istedi, búginde olar turǵylyqty jeri boiynsha odan ári ambýlatoriialyq emdelýge jaqsartylyp shyǵaryldy», - dep túiindedi bas dáriger.
Esterińizge sala ketsek, 29 mamyr kúni Almaty oblysynyń Sharyn shatqalynda sel júrip, 2 adam mert bolyp, 1 adam iz-túzsiz joǵalǵany, taǵy 6 adam zardap shekkeni habarlanǵan bolatyn.
