Qazaq taǵamtaný akademiiasynyń prezidenti, meditsina ǵylymdarynyń doktory Tóregeldi Sharmanov «Antikor Live» jobasyna kelip, óz oiymen bólisti. Onyń aitýynsha qazirgi indet órshigen jaǵdaida ár adam úidegi jas úlken kisilerdiń jaiyn oilaýy kerek, dep habarlaidy QazAqparat.
«Bul indettiń basty qaýpi – úlken jastaǵy adamdardy alyp ketýi. Sondyqtan jastar eń aldymen qaýip-qaterden ózderin saqtap qana qoimai, úlken kisilerdi oilaýy kerek. Jastar qazir óz úiine, otbasyna bir ujym dep qarap, ainalasyn qorǵaýy tiis», - deidi Tóregeldi Sharmanov.
Qazaq taǵamtaný akademiiasynyń prezidenti dál qazirgi ýaqytta adam densaýlyǵyna qandai taǵamdar paidaly ekenin aityp berdi.
«Qazir qoiý nemese qýyrylǵan tamaqty jeýdiń ornyna suiyq tamaqty kóp ishý kerek. Sý bolsyn, qymyz bolsyn, sorpa-sý bolsyn suiyq ishý kerek. Qymyz ben airannyń paidasy zor. Osy kúni jylqynyń qazaq úshin qadiri artty. Sebebi adamnyń aǵzasyna jylqy eti óte jaqsy áser etedi. Árine dál qazirgi kúni qymyz ben jylqy etine jeter esh taǵam joq. Biraq oǵan jurttyń báriniń qoly jete bermeýi múmkin. Qazaq jalpy «qoidyń eti qorǵasyn» dep tekke aitpaidy. Keshki asqa qoidyń etin jeseńiz, ol erteńgi kún batqansha sińedi. Uzaq. «Siyrdyń eti tań saraiy batqansha, jylqynyń tósek salyp jatqansha» deidi qazaq. Iaǵni jylqy eti boiǵa tez sińedi. Sondyqtan jylqy etiniń qasieti erekshe ekenin kórsetedi. Ol ǵylymi jolmen dáleldengen. Men onymen kóp ainalystym. Ony jai derekten alyp otyrǵan joqpyn. Ózim zerttep, kózim jetken. Tolyqqandy jaýapkershilikpen aita alamyn», - dedi ol.
Tóregeldi Sharmanovtyń sózinshe bul aýrýǵa birinshi tótep beretin faktor – taǵam.
«Seniń ómir súrýińniń sapasy – ishken asyńmen ólshenedi. Biz ádette balalardyń amandyǵyn, toqtyǵyn birinshi orynǵa qoiamyz. Al qazirgi jaǵdaida úidegi kárilerdiń qamyn birinshi oilaý kerek. Sebebi balalardyń boiynda aýrýǵa tótep berer immýnitet joǵary. Al úlken kisilerdi bul indetten saqtaý kerek. Moraldyq turǵyda alǵanda da úlken kisilerdiń amandyǵyn birinshi oilaý kerek», - dedi ol.
