Almaty qalasynyń Din isteri basqarmasynyń aqparattyq-túsindirý tobynyń múshesi, filosofiia ǵylymdarynyń doktory Gúlnar Jumanova onlain brifing barysynda vaktsina salý jónindegi islamdyq pátýa týraly aitty, dep habarlaidy "QazAqparat" HAA.
Spiker qazirgi teologiia barlyq ózekti máselelerge, sonyń ishinde densaýlyq saqtaý men vaktsina salýǵa qatysty suraqtarǵa jaýap beretinin jetkizdi.
Onyń pikirinshe, shariǵat erejeleriniń biri - qaýiptiń aldyn alý. Sondyqtan immýndaýdy júrgizgen jón, óitkeni vaktsina salýdyń ziiannan góri paidasy kóp. Demek, ekpe saldyrý óte qajet.
«Máselen, BAÁ, Túrkiia, Malaiziia siiaqty musylman elderinde koronavirýsqa qarsy vaktsina ýlema pátýasynyń ruqsatymen júrgiziledi. Saýd Arabiiasy vaktsinatsiiamen qamtý boiynsha álemdegi eń joǵary elderdiń biri jáne osy el úkimetiniń ótinishi boiynsha Mekkege qajylyqqa qatysýshylardyń barlyǵyna COVID-19 vaktsinasy mindetti. Al, bizdiń elde kóp jyldar boiy Qazaqstan musylmandary dini basqarmasynyń pátýasy qoldanysta. Onda «islamda adam ómiri men densaýlyǵynan artyq qundylyq joq, sondyqtan árkim óz densaýlyǵyna erekshe nazar aýdarýy kerek delingen», - deidi spiker.
Gúlnar Jumanova «aýyryp em izdegenshe aýyrmaityn jol izde» degendi basa aitty. Sondyqtan ár adam dertti emdeý men onyń aldyn alý joldary týraly oilanýy tiis.
«Shariǵat zańy vaktsinaǵa ruqsat etedi. Bizdiń elde jáne álemde epidemiialyq jaǵdaidyń nasharlaýyna bailanysty, immýndaý shuǵyl túrde qajet. Sondyqtan QMBD turǵyndardy densaýlyqtary men ómirlerin saqtap qalý úshin vaktsinalanýǵa shaqyrady. Allanyń qalaýy – adamdardyń deniniń saý bolýy, al basty áreket – ekpe saldyrý. Sonda ǵana ózimiz de, elimiz de qaýipsiz bolady», - dedi Gúlnar Jumanova.
