QR Mádeniet jáne sport ministrligi 15 tamyz kúni tanymal kompozitor Shámshi Qaldaiaqovtyń 90 jyldyǵyna arnalǵan birqatar onlain is-shara ótetindigin málim etti, dep habarlaidy "Ult aqparat".
Atap aitqanda, mereitoi Qurmanǵazy atyndaǵy Qazaq memlekettik akademiialyq halyq aspaptary orkestri ázirlegen Halyqaralyq Shámshi ánderi festivaliniń onlain-kórsetilimimen bastaý alady.
Otyrar aýdanynyń Shámshi Qaldaiaqov týǵan ólkesinde búgin saǵat 15:00-de kompozitor ómirge kelgen, qaita jańartylǵan mýzei-úiiniń ashylý saltanaty ótedi. Ashylý saltanatynda Mádeniet jáne sport ministri Aqtoty Raiymqulova, Túrkistan oblysynyń ákimi Ómirzaq Shókeev jáne kompozitordyń uly Muhtar Qaldaiaqov qatysady. Keiinnen osy jerde kompozitordyń eskertkishine saltanatty gúl qoiý rásimi bolady.
Aitýly kúni «Qazaqkontsert» memlekettik kontserttik uiymy» janyndaǵy «Kontserttik-gastroldik qyzmet ortalyǵy» «Meniń Qazaqstanym» halyqaralyq mýzykalyq chellendjiniń tusaýyn kesip, jyl sońyna deiin jalǵastyrmaq. Bul mýzykalyq marafonǵa qazaqstandyq belgili ártister men akterler, sportshylar men memleket jáne qoǵam qairatkerleri, alys-jaqyn shet elderdegi qandastarymyz ben kúlli otandastarymyz atsalysady dep kútilýde.
Sondai-aq Mádeniet jáne sport ministrliginiń Youtube arnasy arqyly «Jaz áýenderi» jobasy aiasynda Kenen Ázirbaev atyndaǵy Jambyl oblystyq filarmoniiasynyń «Án padishasy – Shámshi aǵa» atty onlain-kontserti kórermenderge usynylmaq.
Uly mýzykanttyń shyǵarmashylyǵyn jaqsy kóretinder ministrliktiń Youtube arnasynda Jambyl atyndaǵy Qazaq memlekettik filarmoniiasynyń «Qazaq valsiniń koroli» kontsertin kóre alady.
Mereitoilyq sharalar kezegin Nur-Sultan qalasyndaǵy QR Ulttyq akademiialyq kitaphanasy jalǵastyryp, el nazaryna «Qazaq valsiniń koroli – Shámshi Qaldaiaqov» virtýaldy onlain-kórmesin usynady. Odan basqa, QR Ulttyq kitaphanasynyń áleýmettik jelilerindegi resmi paraqshalarynda Shámshi Qaldaiaqovtyń ánderinen «Meniń Qazaqstanym» atty kontserti ótedi.
Sh. Qaldaiaqovtyń 90 jyldyǵyn merekeleý sharalaryna Zaǵip jáne kórý qabileti tómen azamattarǵa arnalǵan respýblikalyq kitaphana da atsalysady. Uiym kórermenderge «Án-aǵa» atty ádebi-mýzykalyq kesh uiymdastyrmaq. Keiinnen oqyrmandarǵa «Qazaqstannyń halyq artisi Shámshi Qaldaiaqovtyń týǵanyna 90 jyl» atty mýzykalyq video-dárisin syilamaq.
Aita keteiik, biyl kompozitordyń mereitoiyn merekeleýge arnalǵan ministrliktiń memlekettik áleýmettik tapsyrysy aiasynda tuńǵysh ret Qazaqstan sýretshileriniń shyǵarmashylyq jumystary negizinde «Shámshi álemi» atty onlain mýltimediialyq kórme uiymdastyrylady. Joba nátijesinde shyǵarmashylyq jumystardyń katalogyn shyǵarý kózdelgen.
Atalmysh joba aiasynda Shámshi Qaldaiaqovtyń shyǵarmashylyǵy men qazaq án ónerinde qaldyrǵan aýqymdy murasy elimizdiń barlyq óńirlerinen jinalǵan sýretshilerdiń týyndylarynda beinelenetin bolady.
Odan bólek respýblikalyq mýzeiler men kitaphanalar shette qalmaidy. Ózderiniń áleýmettik jelidegi paraqshalarynda kórermender nazaryna kompozitordyń ómirine arnalǵan virtýaldyq kórmeler men onlain-lektsiialaryn usynbaq.
Máselen, 15 tamyz kúni Qazaqstan Respýblikasynyń Ulttyq mýzeiiniń resmi paraqshalarynda rejisser, stsenarist, ánshi-kompozitor Oralbek Sarybasovpen mýzykalyq onlain-suhbat ótedi. Sondai-aq mýzeidiń onlain kórermenderiniń arasynda kompozitordyń ómiri men shyǵarmashylyǵyna arnalǵan Muzei Time test-saýalnamasy uiymdastyrylmaq.
Merekelik baǵdarlama bunymen toqtap qalmaidy.
17 tamyz kúni QR Ulttyq mýzeiiniń qoryndaǵy Sh. Qaldaiaqov murasy týraly beinesiýjet shyǵyp, 26 tamyzda «Qazaq mýzyka tarihyndaǵy biregei tulǵa» atty beineekskýrsiia, Nur-Sultan qalasyndaǵy QR Ulttyq akademiialyq kitaphanasynyń uiymdastyrýymen «Qazaq valsiniń koroli – Shámshi Qaldaiaqov» virtýaldy kórmesi uiymdastyrylmaq.
Mereitoi kúninen keiin de is-sharalar jalǵasyn tabady.
23 qazan kúni Qurmanǵazy atyndaǵy Qazaq memlekettik akademiialyq halyq aspaptar orkestri «Vals koroli» kontsertin kórermender nazaryna usynady. Aǵymdaǵy jyldyń qazan aiynda Abai atyndaǵy Qazaq memlekettik opera jáne balet teatry kompozitordyń shyǵarmalaryn nasihattaityn kontsertin, al qarasha aiynda Jambyl atyndaǵy Qazaq memlekettik filarmoniiasy kompozitordyń shyǵarmashylyǵyna arnalǵan mereitoilyq kontsert ótkizedi. Sonymen qatar, aǵymdaǵy jyldyń qarasha aiynda «Qazaqkontsert» Memlekettik kontserttik uiymynyń «Saz & Soul» vokaldy-aspaptyq toby óz kórermenderin áleýmettik jelilerde jariialanatyn merekelik kontsertimen qýantady.
El óńirlerindegi filarmoniialar men shyǵarmashylyq ujymdar áigili kompozitordyń mereitoiyn merekeleýge úles qosatynyn atap ótken jón.
Osylai, Túrkistan obylysynda epidimiialogiialyq jaǵdaiǵa bailanysty onlain formatynda ótetin jyl sońyna deiin 100-ge jýyq is-shara josparlanyp otyr.
