Shamalǵanda bolǵan tragediiadan keiin jergilikti halyq bilikten kópir salýdy talap etti.
Jergilikti turǵyndar jantúrshigerlik tragediia bolǵan orynǵa jinaldy. Kópir salýdy talap etken halyq temirjol mańynan ketpei qoiǵan, dep habarlaidy almaty.tv.
Shamalǵandyqtardyń aitýynsha, olar kún saiyn osy temirjol ótkelinen ári-beri ótedi. Bul jerde únemi kólik keptelisi, sol sebepti jol apaty da jii bolatyn kórinedi.
"Áli neshe adam ólýi kerek?", "erteń balam osy ótkelden ótip, mektepke barady, sonda ne bolady?", - dep aiǵailady narazy jurt.
Halyqtyń shaǵymyn tyńdaýǵa Almaty oblysy Qarasai aýdanynyń ákimi Jandarbek Dalabaev keldi. Ol jergilikti turǵyndarǵa bastamashyl top quryp, ákimdikke júginýge keńes berdi.
Dalabaev halyqtyń talap-tilegi oblys ákimi men memleket basshysynyń qulaǵyna jetkenin aitty.
"Sabyr saqtańdar, qazir kópir dep aiǵailaǵanmen, ol birden salyna qoimaidy. Senderde qordalanǵan másele tek jol ǵana emes, basqasy ekenin bilemin. Sondyqtan ekinshi kúni jinalyp, aqyldasaiyq, men eshqaida qashpaimyn. Kópir salýǵa áreket jasaimyz", - dep ýáde etti ákim.
Jeksenbi kúni keshke Almaty oblysynda poiyz temirjolda turǵan jolaýshylar avtobýsymen soqtyǵysty.
Temirjol ótkeli retteledi, poiyz jaqyndaǵanda, signalizatsiia iske qosylǵan.
"Qazaqstan temir joly" AQ habarlaýynsha, avtobýs júrgizýshisi kepteliske qaramastan, temirjolǵa shyǵyp ketken.
Sońǵy málimet boiynsha, bir adam – avtobýs júrgizýshisi qaza boldy, taǵy úsheýi jan saqtaý bóliminde jatyr – ol 33 jastaǵy áiel men eki bala (úsh jáne bes jasar). Dárigerler olardyń jaǵdaiy aýyr ekenin aitty.
Apattyń sebepterin anyqtaý úshin arnaiy komissiia quryldy.
