Eger ata-analardyń ótinishteri bolsa, bastaýysh synyptar boiynsha ýaqytsha synyptardy ashyp berýge daiynbyz. Bul týraly Ortalyq kommýnikatsiialar qyzmetinde ótken onlain-brifingte QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«1 qyrkúiekten bastap elimizdegi barlyq mektep qashyqtan oqidy. Osyǵan qatysty 1-2 kishigirim máseleni aityp óteiin. Birinshiden, qashyqtan oqytý formatyn engizemiz dep aitqannyń ózinde bizde shalǵaidaǵy aýyldarda shaǵyn jinaqty mektepter bar. Olarda 5, 10, 15 bala bar. Olar óz mektepterine jaiaý baryp júredi. Osyndai qaýip joq óńirlerde ornalasqan mektepterde shtatty rejimde ári qarai oqytýǵa, jumys isteýge múmkindik berip otyrmyz», - deidi Bilim jáne ǵylym ministri Ashat Aimaǵambetov.
Onyń aitýynsha, ekinshi másele bastaýysh synyp oqityn oqýshylarǵa qatysty.
«Eger ata-analardyń ótinishteri bolsa, naqty osy bastaýysh synyptar boiynsha ýaqytsha synyptardy ashyp berýge daiynbyz. Osyndai synyptar ashqanda tiisti jaǵdai jasaýymyz qajet. Sanitarlyq talaptarǵa sai barlyq jumys júrgiziletin bolady. Bala tańerteń sabaqqa kelgende dene qyzýyn ólsheý, ony zalalsyzdandyrý máselesin qolǵa alý boiynsha, synyptardy birneshe aýysymǵa bólý máselesin qarastyratyn bolamyz. Synypta 10-15 bala ǵana bolyp, iaǵni synyptardy birneshege bólip oqytý máselesin qarastyramyz», - deidi ol.
