"Men qazaqpyn" atty xalyqaralyq baiqaýdyń irikteý týrlary barlyq oblystarda, sondai-aq Resei, Qytai men Mońǵoliia jerinde turatyn qandastarymyzdyń arasynda ótkiziledi, dep xabarlaidy Ult.kz tilshisi QazAqparat agenttigine silteme jasap.
"Qazaqstan" RTRK" basqarma tóraǵasy Erlan Karinniń aitýynsha, 9-27 tamyz aralyǵynda jobanyń irikteý týrlarynyń kúndeligi kórsetiledi. Al baiqaýdyń tolyq nusqasy 3 qyrkúiekten bastap ulttyq arnanyń efirine shyǵady.
"Al búgingi baspasóz máslixatyn ótkizýimizdiń basty maqsaty - bul jobany múmkindiginshe búkil elge jetkizip, alystaǵy aýyldar men aýdandardaǵy daryndy ónerpazdarymyzdy tartý. Bizge tek oblys ortalyǵynda júrgen ónerpazdardy ǵana emes, shalǵai aýdandardaǵy qarapaiym óner maitalmandaryn da taýyp, úlken saxnaǵa shyǵarýymyz qajet. Bul - bizdiń túpki maqsatymyz. Aldaǵy ýaqytta biz baiqaýǵa qatysty xabarlandyrýlardy áli de taratatyn bolamyz. Osy jumysqa korporatsiianyń barlyq oblystyq bólimsheleri atsalysady", - deidi Karin.
Aita keteiik, búgin Astanada ótken baspasóz máslixatynda QR Aqparat jáne kommýnikatsiialar ministri Dáýren Abaev "Men qazaqpyn" atty xalyqaralyq megajobanyń bastalatynyn jariialady. Baiqaýdyń basty maqsaty - qazaq xalqynyń tól óneri, sonyń ishinde jyr-termeler men kúilerdi búgingi zaman talabyna sai jańartyp, óskeleń urpaqqa jetkizý. Ol úshin arnaiy toby árbir oblysty aralap, jobaǵa qatysýshylardy irikteidi. Oq boiy ozyq shyqqandar televiziialyq baiqaýǵa joldama alady. Baiqaýǵa qatysýshylardyń jas ereksheligi - 18 ben 40 jas aralyǵy. Sondai-aq saxnaǵa shyǵatyn ónerpazdardyń kiimi qazaqy úlgide ári búgingi zaman talabyna sai bolýy tiis. Jobaǵa Qazaqstan azamattarynan bólek, Resei, Qytai men Mońǵoliia jerinde turatyn qandastarymyz da qatysa alady.
