Tótenshe jaǵdailar ministrliginiń basshysy Iýrii Ilin shuǵyl brifingte Qaraǵandy oblysynda shahtada bolǵan qaiǵyly oqiǵanyń mán-jaiyn aityp berdi, dep habarlaidy Sputnik Qazaqstan.
"Kenetten metan shyǵyp ketken. Datchikter jinalǵan shyǵaryndynyń 41%-ke deiin birneshe ese joǵarylaǵanyn birden kórsetken. Kenishtegi alty adam ózin-ózi qutqarý quraldaryn qoldanyp úlgermei, oqiǵa ornynda kóz jumdy. Shahtaǵa kireberiste bolǵan eki adam ózin-ózi qorǵaý quraldaryn qoldanǵan, aýyr halde aýrýhanaǵa jatqyzyldy", - dedi TJM basshysy.
Ol sot-meditsinalyq sarapshylardyń resmi qorytyndysy máiitti soiyp teksergennen keiin 1-2 kúnniń ishinde daiyn bolatynyn atap ótti.
Qazir aýany soryp, gazsyzdandyrý jumystary júrgizilip jatyr. Erteń tańerteńnen bastap komissiia men tergeý toby jumys isteidi. Komissiia quramyna túrli vedomstvolardyń, sonyń ishinde ishki ister ministrligi, tótenshe jaǵdailar ministrligi, eńbekti qorǵaý, áleýmettik qorǵaý, densaýlyq saqtaý bólimsheleriniń ókilderi jáne AMT kompaniiasynyń ókilderi kiredi.
"Bul jaǵdaidyń sebebin jasyrý faktileri bolmaidy. Komissiia tragediianyń sebebin anyqtap, mundai faktilerdi endi boldyrmaityn usynystar ázirleý úshin jumys isteidi", - dep sendirdi Iýrii Ilin.
Onyń aitýynsha, qylmystyq jaýapkershilikke tartylatyn kúdiktiler toby qazirdiń ózinde bar. Buǵan deiin politsiia qylmystyq is qozǵaǵan.
Sonymen qatar Iýrii Ilin eńbek shartyna sáikes, qaza bolǵandardyń otbasyna 10 jyldyq jalaqy tólenetinin atap ótti.
"Jeke eńbek kelisimsharttary aiasynda kreditti jabý, qaza bolǵandardyń stýdent-balalarynyń oqý aqysyn tóleý máselesi qaralady. Kompaniia búginde baspanaǵa muqtaj jandardyń máselesin sheshýi de múmkin", - dep tolyqtyrdy Ilin.
Sondai-aq ol úkimet komissiiasy atynan qaza bolǵandardyń týystary men jaqyndaryna kóńil aitty.
"Komissiia osy tótenshe jaǵdaidyń barlyq sebebi anyqtalǵansha jumys istep, zardap shekkenderdiń otbasylary men emdelýge muqtaj jandarǵa jan-jaqty kómek kórsetedi", - dep túiindedi Ilin.
Eske salaiyq, 7 qarasha kúni saǵat 08:37-de «ArselorMittal Temirtaý» AQ Kómir departamentiniń «Abai» shahtasynda tótenshe jaǵdai oryn aldy. Apat kezinde shahtada barlyǵy 64 adam bolǵan. 56 adam ózderi jer betine shyqqan. Metan gazy taraǵan 3-K10 kenjarynda segiz adam qalǵan. Altaýy qaza taýyp, ekeýi zardap shekti, olardyń jaǵdaiy aýyr.
