Mańǵystaý oblysynyń ákimi Serikbai Trumov óńir turǵyndaryna úndeý jasady, dep habarlaidy "Ult aqparat".
Mańǵystaý oblysynyń ákimi Serikbai Trumov qaýipti indet - koronavirýs pen pnevmoniianyń kún saiyn ósip bara jatqanyna alańdap, óńir turǵyndaryn karantin talaptaryn qatań saqtanýǵa shaqyrdy.
«Búgingidei elimiz úshin asa qaýipti bolyp otyrǵan syn sátte sizderge arnaiy ún qatyp otyrmyn. Jaǵdai óte kúrdeli. Turǵyndar arasynda naýqastardyń sany artyp, aýrýhanalarǵa túsip jatqandar óte kóp. Sońǵy táýlikte óńirde qaýipti indetti juqtyrǵandar sany 208-ge jetti», - dedi Trumov.
Oblystaǵy aýrýhanalarǵa bir kúnniń ishinde 72 naýqas túsip otyr. Sońǵy málimetterge sáikes, búginde dál osy diagnozben 506 adam em qabyldaýda. Olardyń 31 aýyr, 12 óte aýyr halde jatyr. Aýrýhanalarymyz tolýǵa jaqyn. Ókinishke qarai bul koronavirýstan kóz jumǵandar sany da kóbeiip barady. Shilde aiy bastalǵaly eki apta ishinde 34 adam qaitys boldy.
«Jaǵdaidyń kúrdeliligin eskere otyryp, barshańyzdy sanitarlyq talaptardy qatań saqtaýǵa shaqyramyn. Byltyrdan beri júzdegen jandy jalmaǵan indettiń betin qaitarýǵa birlese atsalyspasaq, dárigerlerdiń kómegimen aýyzdyqtaý múmkin bolmai otyr. Eldiń, jaqyndaryńyzdyń amandyǵy úshin toi, sadaqa jasaýdy, kópshilikti jinaýdy ýaqytsha toqtatýlaryńyzdy suraimyn. Árbir adam jaýapkershilikti tereń sezinbeiinshe, qaýip seiilmeidi», - dedi ákim óz úndeýinde.
