Senim men sabaqtastyq

«Egemen Qazaqstan» gazetinde QR Prezidenti Qasym-Jomart Toqaevtyń el basshylyǵy laýazymyna kiriskenine eki jyl tolýyna arnalǵan maqala jaryq kórdi.

* * * 

Osydan týra eki jyl buryn Qazaqstan Respýblikasynyń Prezidenti Qasym-Jomart Kemeluly Toqaevtyń ant berip, Memleket basshysy qyzmetine kiriskeni belgili. 

Sonda senimge sert bere turyp, Prezi­dent Qasym-Jomart Kemeluly qaimana hal­qymen birge úkili úmitpen parasat bii­ginen ulttyń jańa bolmysyn qalyp­tas­tyrýǵa negiz bolatyn sony baǵdarlamasyn jariia etti.

Ol «Sabaqtastyq. Ór­leý. Ádildik» edi. Dál osy asyl murat, izgi qaǵidat bo­iyn­­sha ótken eki jyldaǵy elimizdiń qol jet­ki­z­gen qomaqty tabystaryn baǵalap, sara­laý­ǵa bolady. Shyn máninde, Elbasynyń el úshin nebir to­syn synnan súrinbei ótken tekti tul­ǵany tań­daýyn jáne Qazaqstan halqynyń joǵa­ry senimi tolyǵymen aqtalǵanyn ýaqyt dáleldep otyr.

Árine, ótken eki jyl elimiz úshin ońai bol­ǵan joq. Arys, Qordai jáne Maqtaaral­daǵy qaiǵyly oqiǵalar, búkil álemdi sharpy­ǵan SOVID-19 pandemiiasy jáne sonyń sal­­­dary­nan týyndaǵan ekonomikalyq daǵ­darys. Osyndai kúrmeýi qiyn kúrdeli kezeń­ge qaramastan, Prezident baisaldy qal­py­men baiandy bastamalardy júzege asyr­dy. Ulttyq keńes qurylyp, el úshin ózek­ti má­seleler qolǵa alyndy, Prezidenttik kadr­lyq rezerv jasaqtaldy, muǵalimder men dári­ger­lerdiń jaǵdaiyn jaqsartý boiynsha shara­lar qabyldandy. Prezidenttiń kadrlyq sheshim­deri meritokratiia qaǵidatynyń kórneki úl­gisi boldy. Demokratiialyq pro­tses­ter­diń damýyn jedeldetýge jáne Qazaq­stan­nyń saiasi júiesin reformalaýǵa baǵyttalǵan bir­­qatar zańǵa ózgerister men tolyqtyrýlar en­­gizil­di. Bul rette, sailaý týraly jáne jer jó­­nin­degi daýly máselege núkte qoiǵan taǵ­dyr­­sheshti zańdardy airyqsha ataýǵa bolady. Osy­lai «Halyq únine qulaq asatyn memleket» tujy­rymdamasy naqty júzege asa bastady.

Pandemiianyń naǵyz qysyp turǵan shaǵyn­da daǵdarys jaǵdaiyna qaramastan, jańa aýrýhanalardyń qurylysyn qamtamasyz etti. Halyqtyń az qamtylǵan toptaryn qoldaý sharalary shuǵyl júzege asyryldy, osylaisha memleket óz azamattaryn qiyndyqta qal­dyr­maitynyn kórsetti. Sondai-aq azamat­tarǵa ózderiniń zeinetaqy jinaqtaryn jyl­jy­­mai­tyn múlik satyp alý nemese emdelý aqy­syn tóleý úshin paidalanýǵa múmkindik berý tý­raly sheshim memlekettiń adamdardyń ál-aýqa­tyna qamqorlyqpen qaraitynynyń, halyq úshin daǵdarystyń saldaryn barynsha jeńil­detýge umtylysynyń aiqyn kórinisi bol­dy. Álem­degi jaǵdai barshaǵa belgili jáne biz­diń sa­lys­tyrýǵa turarlyq jaqtarymyz bar.

Gýmanitarlyq salada da mańyzdy bastamalar sátti júzege asyryldy. Ulyq Ulystyń 750 jyldyǵyn, Abaidyń 175 jyldyq mereitoiyn, sondai-aq ál-Farabidiń 1150 jyldyq mereitoiyn joǵary deńgeide atap óttik. Bul toilar ulttyń jańa bolmysyn qalyp­tastyrý maqsatynda, ysyraptan ada, dań­ǵazadan aýlaq, rýhani kemeldený baǵy­tynda, qundylyqtardy jańǵyrtý raiynda uiym­dastyryldy. El biligi joǵaryda atal­ǵan bastamalardy aýyr ekonomikalyq jaǵ­dailarǵa qaramastan júzege asyrdy. Jalpy, Prezidenttiń ádebietke, ónerge, shyǵarmashylyqtyń damýyna kóńil bóletini nazarǵa aldymen ilinedi, onsyz ulttyń rýhani damýy múmkin emes ekeni anyq.

Túrli boljamdarǵa qaramastan, syrtqy saia­satta da irgetasyn Elbasy qalaǵan kópvek­tor­ly baǵyttyń sabaqtastyǵy saqtaldy. Qazaqstan óziniń strategiialyq seriktes­­teri­men, áýeli óziniń ulttyq múddelerin eskere otyryp, syndarly yntymaqtastyqty da­my­týdy jalǵastyrýda. Qazaqstannyń ha­lyq­aralyq bedeli udaiy ósip keledi. Bul oraida 2021 jyldyń 31 naýryzynda ótken Túrki Keńesi memleketteri basshylarynyń Sam­mitin atap ótken jón. Elbasynyń basta­masymen tarihi Túrkistan qalasyn Túr­ki áleminiń rýhani astanasy dep jariialaý elimizdiń halyqaralyq bedelin odan ári nyǵaitýǵa baǵyttalǵan mańyzdy qadam boldy. Q.Toqaevtyń EAEO elderiniń kósh­bas­shy­laryna úndeýi Eýraziialyq yntymaq­tas­tyq­tyń taiaýdaǵy bes jylǵa arnalǵan negizgi baǵyttaryn aiqyndap berdi.

Eldiń birligin saqtap, izgilik pen rýhani úndestikke serpin berý Qasym-Jomart Toqaev prezidenttiginiń eki jylyndaǵy eń basty jetistik dep sanaimyz. Aspai, saspai, «aqyryn júrip anyq basqan», senimge sert bergen, baiypty bailammen, berik ustanymmen bolashaqqa batyl bet túzegen Prezidenttiń Elbasy jolyn jarasymmen jalǵastyryp, sátimen sabaqtastyryp, «saiasi jańǵyrýdyń qazaqstandyq modelin» symbattai túskeni baiqalady. Taiaýda Elbasy N.Á.Nazarbaevtyń Qazaqstan halqy Assambleiasy Tóraǵasy­nyń óki­lettigin Q.Toqaevqa tapsyrýy da osy úi­le­sim men úndestiktiń úzdik úlgisi ispetti. Son­­­dyqtan sabaqtastyq saltanatymen ultty uiys­tyra túsken ulaǵatty jol eldiń jarqyn bola­shaqqa degen senimin de eselei túsedi.

Darhan Qydyráli