QR Parlamenti Senatynyń depýtattary Bekmyrza Elamanov jáne Murat Baqtiiaruly oblys ortalyǵyndaǵy birqatar nysandardy aralady.
Halyq qalaýlylary aldymen Aqsýat aýyldyq okrýgindegi «QazAgroMir» JShS-ne qarasty jylyjai qurylysymen tanysty. Jalpy quny 1 mlrd. teńge bolatyn jylyjai qurylysy qarqyndy júrgizilýde. Qazirdiń ózinde munda 50 den astam qurylysshy eńbek etýde. Aýmaǵy 2 gektarǵa jýyq atalmysh oryn óz jumysyn bastasa, qala men eldi mekender kókónis ónimderimen turaqty qamtamasyz etiledi. Sondai-aq, 30 adam eńbekpenpen qamtylady.
Munan soń Qaraýyltóbe aýyldyq okrýgindegi «Natishaeva» sharýa qojalyǵynyń jumysymen tanysty. «Natishaeva» jeke kásipkerligi birneshe salany qatar alyp, kásibin dóńgeletip otyr. Bul kásiporynda turaqty jáne aýysymdyq negizde 350-ge jýyq adam eńbek etedi. Olardyń ortasha jalaqysy – 70 myń teńge. Kásipkerge qatysty jylyjaiǵa barǵanda jumysshylar ony aldaǵy maýsymǵa daiyndap jatyr eken. Keshen 2014 jyly salynǵan. Ondaǵy eńbek adamdary arnaiy dáris alǵan.
– Kórshiles Ońtústik Qazaqstan oblysyndaǵy áriptesterimizben tájiribe almastyq. Aqyryndap osy salany igere bastadyq. Tutynýshylardan suranys óte joǵary. Qyzylordalyqtardy jergilikti ónimmen qamtamasyz etsek deimiz. Osy maqsatta tynbai ter tógýdemiz, – deidi jylyjai kesheniniń mamandary.
Sonymen qatar munda «Orda» sharýa qojalyǵy ornalasqan. Keshende mal bordaqylaý alańy, mal soiý pýnkti, et baǵytyndaǵy qus fermasy bar. Munda 120 myń «Arbor-Aikres» tuqymdas taýyq ósiriledi. Kúnine 6500 jumyrtqa, 5 tonna et óndirýge múmkindigimiz jetedi. Qusty Almaty oblysynan ákelip otyrmyz. Búginde bul orynda 17 adam jumys jasaidy, – deidi qus ósirý sharýashylyǵyna jetekshilik etip otyrǵan Kenjebek Qalmuratov.
– Jergilikti sharýalar halyqty kókónispen, jemispen tolyqtai qamtamasyz ete almai otyr. Sondyqtan Ózbekstan men Qytaidan ákelingen ónim naryqty jaýlap aldy. Qys mezgilinde jylyjaida ósirilgen qyzanaq pen qiiar suranysty óteýi tiis. Ókinishtisi, elimizdiń barlyq óńirinde jylyjai sharýashylyǵy kórkeiip, eldi ónimmen qamtyp otyr dep aitýǵa kelińkiremeidi. Jylyjailar salynyp jatqanymen, damytatyn tustary kóp. Bul rette aimaǵymyzda osyndai irgeli jobalar iske asyrylyp jatqany kóńil qýantady, – dedi Murat Baqtiiaruly.
Senatorlar buǵan deiin oblys aýdandarynda bolyp, Elbasymyz N.Á.Nazarbaevtyń 2018 jylǵy «Tórtinshi ónekásiptik revoliýtsiia jaǵdaiyndaǵy damýdyń jańa múmkindikteri» atty Qazaqstan halqyna arnaǵan Joldaýy men Prezidenttiń bes áleýmettik bastamasynan týyndaityn tapsyrmalar, elimizdegi atqarylyp jatqan jumystar jáne elimizdiń áleýmettik ekonomikalyq órleýin kózdeitin strategiialyq baǵdarlamalardy iske asyrýdyń zańnamalyq negizderi boiynsha túsindirme jumystaryn júrgizgen.
