Aýyl turǵyndarynyń ómir sapasyn arttyrýǵa baǵyttalǵan mindetterdiń oryndalý kórsetkishteri júieli sharalar qabyldaýdy talap etedi. Bul týraly senator Dúisenǵazy Mýsin málim etti, dep habarlaidy "Ult aqparat".
«Salanyń mańyzdylyǵy álemde azyq-túlikke degen suranystyń ósýine jáne pandemiiaǵa bailanysty ekonomikanyń daǵdarysy aiasynda artýda. Qaralyp otyrǵan Memlekettik baǵdarlamanyń júzege asyrylý kezeńinde agroónerkásiptik keshenniń damýyn zańnamalyq qamtamasyz etý, ony memlekettik retteý máseleleri Senat depýtattarynyń tarapynan túrli is-sharalar aiasynda qamtylyp, qoldaý tapty. Ózderińizge málim, «Agrobiznes - 2017» baǵdarlamasy men sý resýrstaryn basqarý memlekettik baǵdarlamalaryn integratsiialaý negizinde ázirlengen bul qujat bir ret ózektendirilip, úsh ret ózgeris engizildi. Onyń oryndalý barysyna jasalǵan taldaý nátijeleri alda atqarylatyn sharalardy aiqyndaý úshin mańyzdy», - dedi D. Mýsin Senattaǵy Qazaqstannyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasyn iske asyrý taqyrybyndaǵy Úkimet saǵatynda.
Onyń aitýynsha, kózdelgen maqsattarǵa jetýde aitarlyqtai kemshilikter baiqaldy.
«Aýyl sharýashylyǵy ministriniń baiandamasynda salanyń negizgi makroekonomikalyq kórsetkishteriniń oń ósý úrdisi qamtamasyz etilgeni aityldy. Baǵdarlama aýqymynda qoiylǵan mindetterdi iske asyrýǵa ótken 4 jylda 2 trln 494 mlrd teńge qarastyrylyp, is júzinde 66 paiyzǵa ǵana qarjylandyrylǵanmen, qaita óńdeý ónimderiniń eksporty - 1,5 ese, aýyl sharýashylyǵy jalpy óniminiń kólemi - 1,7 ese ósip, 6,3 trln teńgeni quraǵan. Alaida, kózdelgen maqsattarǵa, mindetter men nátijelerge jetýde aitarlyqtai kemshilikter barshylyq», - dedi depýtat.
Onyń paiymynsha, salanyń ekonomikalyq ósýi men aýyl turǵyndarynyń ómir sapasyn arttyrýǵa baǵyttalǵan mindetterdiń oryndalý kórsetkishteri júieli sharalar qabyldaýdy talap etedi. Bul qajettilik Esep Komitetiniń aýditorlyq qorytyndylarynda da atap ótilgen.
«Qabyldanǵan sharalarǵa qaramastan, aýyl sharýashylyǵy salasynyń úlesi jalpy ishki ónimniń 5-5,5 paiyzyn ǵana qurap, birqatar azyq-túlik ónimderi boiynsha importqa táýeldilik saqtalýda, onyń kólemi ótken jyly 4 mlrd AQSh dollarynan asqan. Sonymen qatar, aýyl sharýashylyǵy ónimderi men óńdelgen ónimdi ótkizý problemalaryn retteý, azyq-túlik baǵasyn turaqtandyrý maqsatynda saýda-logistika infraqurylymyn damytý, kóterme-taratý ortalyqtarynyń jelisin qurý týraly Baǵdarlamada josparlanǵan mindetter naqty sheshimin tappady. Osyǵan orai, qolǵa alynyp jatqan 24 kóterme-taratý ortalyǵyn qurý, ishki naryqty otandyq azyq-túlik taýarlarymen tolyqtyrý arqyly importty qysqartý sharalary - óte ózekti. Bul rette, qazirgi jaǵdai kórsetkendei, elimiz úshin importtan táýelsizdik qanshama mańyzdy ekeni aiqyndaldy. Atalǵan kemshilikter el halqynyń 41 paiyzy turyp jatqan aýyldyń ahýalyn, salanyń básekege qabilettiliginiń deńgeiin kórsetip, agrarlyq sektorda júieli problemalardyń saqtalýyn aiǵaqtaidy», - dedi senator.
