Senator Aqylbek Kúrishbaev óziniń depýtattyq saýalynda aýyl jastarynyń joǵary bilimge qol jetkizý problemasyn aitty, dep habarlaidy "Ult aqparat".
Depýtat aýyldaǵy bilim deńgeii kóbinese qalalyq deńgeiden artta qalatynyn atap ótti. Aýyldyq jerlerde pedagogterdiń tapshylyǵy 2100-den astam adamdy quraidy, bul respýblikadaǵy pedagog kadrlarǵa degen zárýliktiń 60%-ǵa jýyǵy bolyp otyr. Sonyń nátijesinde kóptegen aýyl balalary grant alý úshin UBT-da qajetti ball jinai almaidy, al olardyń kópshiliginde aqyly oqýǵa múmkindik joq.
Senator agrarlyq mamandyqtarǵa túsý úshin aýyldyq kvotany 30%-dan 50%-ǵa deiin kóterýdi usynyp otyr. Depýtat jyl saiyn joǵary oqý oryndary túlekteriniń tek 30%-y ǵana aýylǵa jumysqa keletini, sonyń saldarynan el biýdjeti jyl saiyn 1,5 mlrd teńgege deiin qarjy joǵaltatyny týraly derekti keltirdi.
«Kóptegen jyldar boiy Parlament depýtattary Bilim jáne ǵylym ministrliginiń aldynda aýyl mektepteriniń túlekterine agrarlyq mamandyqtarǵa túsý úshin aýyldyq kvotany 30%-dan kem degende 50%-ǵa deiin arttyrý qajettiligi týraly máseleni kóterip keledi. Biraq másele tabandy túrde sheshilmei otyr. Agrarlyq ýniversitetterdi bitirýshilerdiń, aýyldyq jerlerge jyl saiyn tek 30%-y ǵana jumysqa ornalasady, qalǵandary memlekettik qarajat esebinen oqyp, jumyssyzdar qataryn tolyqtyra otyryp, qalalarda qalady», - dep málimdedi senator Aqylbek Kúrishbaev.
Senator elimizde bilim berý granttaryn bólý tetigine ózgerister engizetin kez keldi dep sanaidy. Ol memlekettik grant pen stipendiiany test nátijesi men úlgerimi negizinde ǵana emes, sondai-aq memlekettiń qoldaýynsyz oqi almaityndarǵa áleýmettik kómek kórsetý maqsatynda bólý qajettigin de atap ótti.
