1 maýsym – Halyqaralyq balalardy qorǵaý kúninde Almatyda múmkindigi shekteýli balalarǵa arnalǵan meiirim aktsiiasy ótti, dep habarlaidy "Ult aqparat".
Bul shara múgedektigi bar balalar men tárbielep otyrǵan ata-analardy qoldaýǵa baǵyttalǵan. Ony «ITeachMe» biliktilikti damytý ortalyǵy» men Ortalyq Aziianyń Eýraziia qory uiymdastyryp, Jetisý aýdanynyń ákimi M. Qikymov qoldaý kórsetken.
«Sizdiń úiińizge ertegi keiipkeri sońǵy ret qashan kelip edi? Jańa jylda shyǵar. Bul dástúrdi ózgertý bizdiń qolymyzda. Sondyqtan, biz ertegilerdiń siqyrly keiipkerlerimen, syilyqtar men shar alyp, erekshe ekipajdy daiyndadyq. Biz múgedek balalardy tárbielep otyrǵan 30 otbasyǵa baryp, pozitivti energiiamyzben bólistik. Bizdiń oiymyz – ár balany ǵajaiypqa sendirý», - deidi «ITeachMe» biliktilikti damytý ortalyǵynyń direktory Zahira Begalieva.
Ortalyqtyń habarlaýynsha, 12 jasar Rafail sýret salǵandy, qurastyrǵandy jaqsy kóredi. Mýzykalyq aspaptarǵa da jany jaqyn. Keńestik mýltfilmderdi jinaýdy unatady. Bóreneden salynǵan úide turýdy armandaidy.
Al 5 jasar Rýslan sóilemeidi. Ol júzýmen, ippoterapiiamen ainalysady. Eki jylda júzýdi igerip aldy, nátijesi jaman emes. Anasy aitqan ertegilerdi tyńdap, kitap oqyp bergenin jaqsy kóredi.
«Qazir bárimiz qiyn kezeńdi bastan ótkerip jatyrmyz, ár adam úshin úide oqshaýlaný – kúsh pen tózim synaǵyna ainaldy. Biraq kóptegen múgedektigi bar adamdar úshin «oqshaýlaný kezeńi» ómir boiy ótedi. Shynynda da, olardyń qoǵamnyń teń quqyqty múshesi bolýy qiynǵa soǵady. Turǵyn úilerdiń kireberisteri, baspaldaqtar men satylar kedergi keltiredi. Biraq osyndai synaqtarǵa qaramastan, balalar ózderiniń taza janyna, ertegilerge, ǵajaiyptarǵa jáne jaqsy adamdarǵa senedi», - deidi 11 jastaǵy Shýhrat Iýsýpovtyń anasy Almira Iýsýpova.
