Foto: QR TSM
Astanada erler men áielder arasynda sapy boiynsha semserlesýden Álem kýbogi ótip jatyr. Bul – Halyqaralyq semserlesý federatsiiasy (FIE) qoldaýymen uiymdastyrylatyn mańyzdy týrnirlerdiń biri. Qazaqstan mundai deńgeidegi jarysty tarihta alǵash ret qabyldap otyr.
FIE halyqaralyq kúntizbesine jyl saiyn osy sanattaǵy nebári bes týrnir enedi. Atalǵan jarys dástúrli túrde Shveitsariia, Germaniia, BAÁ jáne Kanadada ótedi. Biyldan bastap bul tizimge alǵash ret Qazaqstan qosylyp, Ortalyq Aziiada Álem kýbogin ótkizý quqyǵyna ie bolǵan alǵashqy el atandy.
Jarys 26-29 naýryz kúnderi Astanada ótip jatyr. Týrnirge álemniń 46 elinen shamamen 500 sportshy qatysýda: olardyń 222-si áielder, 272-si erler. Komandalyq saiystarǵa 31 erler jáne 23 áielder quramasy qatysady. Bapkerler, tóreshiler men uiymdastyrýshylardy qosqanda, qatysýshylardyń jalpy sany 1000 adamnan asady.
Ashylý saltanatyna Týrizm jáne sport ministriniń orynbasary Serik Jarasbaev qatysty.
«Memleket basshysynyń tapsyrmasymen sport salasynda aýqymdy reformalar júzege asyrylyp jatyr. Sonyń alǵashqy nátijeleri qazirdiń ózinde baiqalýda. Biyldan bastap balalar men jasóspirimder sport mektepteri bapkerleriniń jalaqysy 30%-ǵa artty. Balalar sportyna bólinetin qarjy shamamen eki esege kóbeidi. Basym sport túrleri aiqyndaldy, legionerlerdi memlekettik qarjylandyrý toqtatyldy, ulttyq sport túrlerine olimpiadalyq sport túrlerimen teń mártebe berildi. Sondai-aq halyqaralyq yntymaqtastyq keńeiip keledi. Sportshylarymyz halyqaralyq arenada tabysty óner kórsetip, el abyroiyn asqaqtatýda. Áleýetti sport rezervi qalyptasyp, balalar sporty damyp kele jatqanyn aita ketken jón. Osyndai deńgeidegi jarystyń elimizde ótýi – Qazaqstannyń halyqaralyq sport arenasyndaǵy bedeliniń artyp kele jatqanyn kórsetedi», – dedi ministrdiń orynbasary.
Týrnirde Qazaqstan atynan 30 sportshy baq synaýda. Olardyń qatarynda Rýslan Qurbanov, Elmir Álimjanov, Erlik Sertai, Kirill Prohodov jáne Vadim Sharlaimov bar. Áielder arasynda 24 sportshy óner kórsetedi, olardyń ishinde Ýliana Pistsova, Sofiia Nikolaichýk, Karolina Fomina jáne Vladislava Andreeva bar.
Eske sala keteiik, byltyr Qazaqstan quramasy semserlesýden álem chempionatynda qola júlde ielenip, tarihi jetistikke qol jetkizgen edi. Al 2024 jylǵy Parij Olimpiadasynda ulttyq qurama 6-oryn aldy. Qurama tabysyna arnaiy shaqyrylǵan bas bapker Oleksandr Gorbachýk zor úles qosyp otyr. Onyń jetekshiligimen Japoniia quramasy Tokio jáne Parij Olimpiadalarynda, sondai-aq 2018 jáne 2022 jylǵy Aziia oiyndarynda chempion atanǵan.
