Semei qalasynda tájik-aýǵan shekarasynda erlikpen qaza tapqan shekarashynyń anasyna medal berildi, dep habarlaidy QazAqparat tilshisi.
QR UQK baspasóz qyzmetiniń málimetine súiensek, Semeidegi ofitserlerdiń garnizon úiinde shekarashy Radjan Batyrqanovtyń anasyna «TMD quramyndaǵy memleketterdiń shekarasyn nyǵaitqany úshin» medali saltanatty túrde tabys etildi.
«TMD qataryndaǵy elderdiń Shekara áskerleri qolbasshylarynyń keńesi – syrtqy shekaralardy qorǵaý jáne olardaǵy turaqty jaǵdaidy qamtamasyz etý máselelerin sheshý úshin 1992 jyldyń 6 shildesinde TMD memleketteriniń basshylary qurǵan halyqaralyq uiym. Batyr shekarashyny marapattaý týraly sheshimdi Ázirbaijan, Armeniia, Belarýs, Qazaqstan, Qyrǵyzstan, Moldova, Resei, Tájikstan, Túrikmenstan, Ózbekstan jáne Ýkrainanyń 11 shekara organynyń Shekara áskerleri qolbasshylar keńesi qabyldady», - delingen aqparatta.
Radjan Batyrqanov (1975-1994) – shekarashy, jaýynger-internatsionalist. Biriktirilgen qazaqstandyq batalonnyń Kúrshim vzvodynyń quramynda bolǵan. 1994 jyly 28 qyrkúiekte tájik-aýǵan shekarasynda qaza tapty. Sodyrlarmen qiian-keski shaiqasta aldyńǵy shepke shyǵyp, erekshe erlik tanytqan.
