Qazan aiynyń úshinshi onkúndiginen bastap «SCAT» áýe kompaniiasy Almaty – Djidda jáne Almaty – Medina baǵyttary boiynsha aptasyna bir reispen ushýdy bastaidy.
Bul týraly Indýstriia jáne infraqurylymdyq damý ministrliginiń Telegram kanaly habarlady.
Qazaqstan Respýblikasynyń aýmaǵynda koronavirýs infektsiianyń paida bolýy men taralýyna jol bermeý jónindegi vedomstvoaralyq komissiia (budan ári - Vedomstvoaralyq komissiia) 2021 jylǵy 7 qyrkúiektegi otyrysynda Qazaqstan men Saýd Arabiiasy arasyndaǵy turaqty áýe qatynasyn qalpyna keltirý jóninde sheshim qabyldady.
Saýd Arabiiasyna reisterdiń odan ári ulǵaiýy epidemiologiialyq jaǵdaiǵa, Vedomstvoaralyq komissiianyń jáne Saýd Arabiiasynyń tiisti memlekettik organdarynyń sheshimderine bailanysty bolady.
«Reister bekitilgen sanitarlyq-epidemiologiialyq normalar men áýe kompaniiasynyń saitynda jariialanǵan kestege sáikes oryndalady», - delingen habarlamada.
