Almaty oblysyndaǵy Kerbulaq aýdanynyń ortalyǵy — Saryózekte turǵyndar turmystyq qaldyqtardy aryqqa aǵyzǵan, - dep habarlaidy "Ult aqparat".
Áleýmettik jelige taralǵan videoda eski úilerdiń balkonynan, qabyrǵasynan uzyn qubyrlardyń daladaǵy aryqqa qarai baǵyttalyp, jasalǵanyn kórýge bolady.
«Saryózek. Dárethana», - dep pikir bilderedi video avtory.
Almaty oblystyq sanitariialyq-epidemiologiialyq baqylaý departamentiniń baspasóz qyzmeti atalǵan jaitqa bailanysty túsinikteme berdi.
«Instagram jelisinde Kerbulaq aýdany, Saryózek aýylyndaǵy 2 qabatty úiden qubyrlar arqyly syrtqa káriz sýynyń aǵyp jatqany týraly video tarady. Shuǵyl túrde jergilikti ákimdik, aýdandyq politsiia bólimi, aýdandyq sanitariialyq-epidemiologiialyq basqarma mamandarynan komissiia qurylyp, atalǵan mán-jaidy tekserdi. Tekserý kezinde anyqtalǵandai, joǵaryda atalǵan 2 qabatty úiler Saryózek aýylynyń Ál-Farabi kóshesinde ornalasqan. Jeke menshik ieliginde. Turǵyndar eshkimniń kelisiminsiz turmystyq qaldyq sýlardy qubyr arqyly kóshedegi aryqqa baǵyttap, tókken. Komissiia jergilikti turǵyndarǵa túsindirý jumystaryn júrgizip, atalǵan is-árekettiń zańsyz ári qorshaǵan ortaǵa epidemiologiialyq turǵydan qaýipti ekendigi túsindirildi. Nátijesinde turmystyq qaldyq sýlardy negizsiz tókkeni úshin atalǵan 2 úidiń turǵynyna QR ÁQB týraly Kodeksiniń 505-baby boiynsha eskertý berilip, trýbalar alynyp tastaldy», - delingen vedomstvonyń habarlamasynda.
