Qaraǵandy oblystyq energetika jáne turǵyn úi-kommýnaldyq sharýashylyq basqarmasynyń basshysy Ulantai Úsenov aimaqty gazdandyrý sharalary týraly aityp berdi, dep xabarlaidy QazAqparat tilshisi.
Onyń aitýynsha, "Saryarqa" gaz qubyrynyń 80 protsenti Qaraǵandy oblysymen ótedi. Sonyń aiasynda alty qalaǵa - Qaraǵandy, Temirtaý, Jezqazǵan, Shaxtinsk, Saran men Abaiǵa gaz tartylady. Budan bólek, oblystyń 114 eldi mekenin tabiǵi gazben qamtamasyz etý kózdelip otyr.
"Búginde Jezqazǵan qalasyn gazdandyrý jobasy saraptamadan ótti. Oǵan 2,4 milliard teńge bólinedi. Qalada arnaiy gaz kesheni salynady. Ol arqyly shamamen 10 000 adamǵa gaz jetkiziledi. Búginde taǵy eki qalanyń jobasy saraptamada jatyr. Jalpy, Qaraǵandy oblysyn gazdandyrý jobasynyń quny - 250 milliard teńge. Búginde xalyqpen birge ArselorMittal Temirtaý, Qazaqmys, Jáirem ken baiytý kombinaty siiaqty kompaniialar da gazdy kútip otyr. Olar ózderiniń óndiristik nysandaryn tabiǵi gazǵa kóshirýge ázir", - dedi U.Úsenov QR Parlament Májilisinde ótken "dóńgelek ústelde".
Basqarma basshysynyń sózine qaraǵanda, Qaraǵandy oblysyn gazdandyrýǵa kedergi jasap otyrǵan birqatar normativtik máseleler bar. Búginde respýblika boiynsha gazdandyrý sharalaryn júrgizýdiń syzba-nusqasy bar. Onyń ishinde Qaraǵandy oblysy da kórsetilgen. "Alaida memlekettik saraptama qyzmeti texnikalyq-ekonomikalyq negizdemeni talap etip otyr. Ol qujattyń qajeti shamaly. Biraq dál sonyń saldarynan Qaraǵandy oblysyn gazdandyrý sharalary tejelip otyr. Sebebi árbir eldi mekenge texnikalyq-ekonomikalyq negizdeme jasaý qajet. Al ol jumysqa bir jyl ketedi. Sosyn jobalyq-smetalyq qujattarǵa taǵy bir jyldai kerek. Sóitip, eki jyl ýaqyt tekke keteiin dep tur", - dep atap kórsetti U.Úsenov.
Aita keteiik, búgingi jiynda QR Energetika vitse-ministri Maǵzum Myrzaǵaliev "Saryarqa" gaz qubyrynyń qurylysy týraly aityp berdi. "Saryarqa" gaz qubyry aldymen Qyzylorda, Jezqazǵan, Qaraǵandy, Temirtaý men Nur-Sultan marshrýtymen salynady. Bul - qurylystyń alǵashqy kezeńi. Osynyń arqasynda qubyrǵa jaqyn ornalasqan 740 myń adamdy tabiǵi gazben qamtasyz etýge múmkindik bar. Árine, infraqurylymnyń salynýyna qarai gaz tutynatyn adamdardyń sany artady. Ótken jyly tamyz aiynda Úkimet jobanyń syzba-nusqasy men qarjylandyrý sharttaryn maquldady. Jobanyń quny - 267,3 mlrd teńge. Qarasha aiynda "Astana gaz" AQ men merdiger kompaniia - "Qazqurylysqyzmet" AQ arasynda tiisti kelisimshartqa qol qoiyldy. Qazirgi kezde barlyq qajetti texnika men mamandar tartyldy. Dánekerleý jumystary bastaldy. "Saryarqa" gaz qubyrynyń, shamamen, 1300 metri salyndy", - deidi M.Myrzaǵaliev.
Al elordanyń otyn-energetikalyq kesheni jáne kommýnaldyq sharýashylyq basqarmasynyń basshysy Erbol Tóleýov Kótaldan keiin gazdyń qai baǵytta tartylatynyn túsindirdi.
