Elordada aýa sapasyna arnalǵan konferentsiiada Tájiribeshil ekologtar qaýymdastyǵynyń tóraǵasy Laýra Malikova lastanǵan qalalar týraly pikir bildirdi, dep habarlaidy QazAqparat.
«Qazgidromet» turǵyn úiler ornalasqan jerlerde aýanyń sapasyna monitoring júrgizedi. Osy monitoring nátijesi boiynsha bizde túrli lastaýshy zattarǵa qatysty ruqsat etilgen kontsentratsiianyń shekti deńgeiinen asyp túsken qalalardyń tizimi anyqtaldy. Mysaly, Qazaqstannyń ortalyq, shyǵys, soltústik bólikterinde kóbine qalqymaly zattar, iaǵni kómir jaǵýdan bólinetin PM 2,5, PM10 kezdesedi», - dedi L. Malikova «Ortalyq Aziiadaǵy aýa sapasyna monitoring» atty konferentsiia barysyndaǵy baspasóz máslihatynda.
Osy oraida ol elordada, Almatyda kómirden gaz jaǵýǵa kóshý jumystary júrip jatqanyn eske saldy.
«Al Aqtóbe, Atyraý qalalarynda kúkirtsýtek jáne ushpa organikalyq qospalar boiynsha ruqsat etilgen kontsentratsiianyń shekti deńgeiinen asyp túsý jaǵdailary baiqalyp otyr. Bul rette Atyraý munai óńdeý zaýyty da aýa sapasyna yqpal etedi. Balqash qalasynda da lastaýshy zattardyń shekti deńgeiden asýy tirkelip jatady» - dedi qaýymdastyq tóraiymy.
Onyń aitýynsha, Shymkent qalasy da lastanǵan qalalardyń qatarynda. Bul qalada eski avtokólikterdiń úlesi joǵary bolyp tur. Óskemende de lastaný jaǵynan másele bar. Osy shaharda iri óndiristik kásiporyndar óziniń áserin tiigizip jatyr.
«Elordadaǵy aýa sapasyna toqtalsaq, qalada jeke sektordyń úlesi zor. Olar kóbine kómir jaǵady. Sońǵy jyldary birtindep gazǵa qosý jumystary júrip jatyr, alaida úilerdiń birazy kómir jaǵady», - dedi ol.
