QR Premer-Ministriniń orynbasary Berdibek Saparbaev jumys saparymen Aqmola oblysynyń Arshaly aýdanyna keldi, dep habarlaidy QazAqparat.
Vitse-premer men Aqmola oblysynyń ákimi Ermek Marjyqpaev Jibek joly aýylynda bolyp, I.Qutpanuly atyndaǵy orta mektepte ótken alǵashqy qońyraý saltanatyna qatysty. Ustazdar qaýymy men oqýshylardy jáne olardyń ata-analaryn bilim kúnimen quttyqtady.
«Kez kelgen memlekettiń damýy azamattarynyń bilimi, mádenieti jáne tárbiesine bailanysty. Sol sebepti, memleket basshylyǵy tarapynan áleýmettik salaǵa erekshe kóńil bólinýde. Elbasynyń tapsyrmasymen pedagogtardyń statýsyn kóterýge baǵyttalǵan zań jobasy ázirlendi. Prezident muǵalimderdiń eńbekaqysyn eki ese kóterý týraly mindetter qoidy. Ózderińiz kýá bolyp otyrǵandai, elimizde qazirgi zamańǵy mektepter, balabaqshalar, aýrýhanalar, teatrlar jáne sport nysandary kóptep salynýda. Munyń barlyǵy Qazaqstannyń álemdik qaýymdastyqta laiyqty orynnan kórinýine baǵyttalǵan», - dedi Berdibek Saparbaev.
I.Qutpanuly atyndaǵy orta mekteptiń irgesi 2011 jyly qalanǵan. Bilim ordasynda 68 ustaz 1 myńnan astam oqýshyny bilim nárimen sýsyndatýda. Biyl mektepke oblystyq biýdjetten 158 million teńge qarjy bólinip, kúrdeli jóndeý jumystary júrgizilgen. Jańa oqý jylynda 137 bala atalmysh mektep tabaldyryǵyn alǵash attady.
Aita keteiik, búginde Aqmola oblysynda 614 mektepke deiingi bilim berý uiymy jumys isteidi, olarda 38 myńǵa jýyq bala tárbielenýde. 2019 jyldyń 1 qyrkúieginen bastap Elbasynyń tapsyrmasy boiynsha balalardy erte damytý baǵdarlamasy engizilýde. Búgingi tańda 3-6 jastaǵy balalardy mektepke deiingi bilimmen qamtý 99 paiyzdy qurap otyr. Barlyq memlekettik balabaqshalarda aǵymdaǵy jóndeý jumystary júrgizildi.
Oblysta 557 memlekettik mektep jumys isteidi, oǵan 124 myńnan astam balany qabyldaý josparlanyp otyr. Onyń 16 myńnan astamy – birinshi synypqa baratyn búldirshinder. Bul ótken jylmen salystyrǵanda 1 myńǵa artyq.
Sonymen qatar, vitse-premer osy aýyldaǵy kópbalaly Qudabaevtardyń otbasynda boldy. Atalmysh otbasy kámelettik jasqa tolmaǵan tórt bala tárbielep otyr. Tabysy az bolǵandyqtan biylǵy sáýir aiynda bul otbasyna aiyna 101 myń teńge kóleminde ataýly áleýmettik kómek taǵaiyndaldy. Memleketten alǵan aqshalai kómekti otaǵasy Azamat Qudabaev shaǵyn biznes – tehnikalyq baiqaý stansasyn ashýǵa baǵyttamaqshy. Al zaiyby Gúlnur «Eńbek» baǵdarlamasy boiynsha arnaiy kýrstan ótip, úiinde nan ónimderin pisirip satady.
«Elimizde áleýmettik jaǵynan az qamtylǵan otbasylardy qoldaýǵa, suranysqa qajetti mamandyqtar jáne biznes negizi boiynsha oqytýǵa baǵyttalǵan túrli memlekettik baǵdarlamalar jumys isteidi. Eń bastysy, balany jastaiynan eńbekqorlyqqa baýlý qajet. Memlekettik kómekti qoldana otyryp, otbasylaryńyzdyń qajettigin qamtamasyz etýde ózderińizdiń eńbektenip jatqandaryńyz qýantady», - dedi Berdibek Saparbaev.
Budan bólek, Berdibek Saparbaev Jibek joly aýylyndaǵy dárigerlik ambýlatoriia, «Bóbek» bóbekjaiy, «Djamilia» JShS jihaz fabrikasynyń jumysymen tanysty.
