Eńbek jáne halyqty áleýmettik qorǵaý ministri Berdibek Saparbaev Aqmola oblysy Tselinograd aýdany, Qoiandy selolyq okrýginiń turǵyndarymen kezdesti. Bul týraly "Ult aqparat" vedomstvonyń baspasóz qyzmetine silteme jasap habarlaidy.
Elbasynyń «Áleýmettik qamqorlyq» áleýmettik sharalaryn júzege asyrý aiasynda jańartylǵan ataýly áleýmettik kómek alýǵa qujattardy qabyldaý aǵymdaǵy jyldyń 1 sáýirinen bastalǵan bolatyn. Ótinishter jumyspen qamtý ortalyqtarynda, halyqqa qyzmet kórsetý ortalyqtarynda, sondai-aq aýyldyq ákimdikterde qabyldanady.
Aýyl turǵyndary aldynda sóz sóilegen vedomstvo basshysy áleýmettik kómektiń jańa formatyn engizýdiń arqasynda Qazaqstanda AÁK alýshylar sany 830 myń adamnan asady dep atap ótti, onyń ishinde Tselinograd aýdanynda olardyń sany 12,3 myńnan 17,6 myń adamǵa deiin artady.
Ministr kópbalaly aýyldyqtar men jastarǵa jańa biznes ideialardy iske asyrý úshin 505 myń teńge kóleminde 10 myń memlekettik grant usynylatynyn atap ótti. Múgedektigi bar 5 myńǵa jýyq adam men kópbalaly analar úshin jeke isin ashýǵa 6,5 mln teńgege deiin jeńildikti mikrokredit berý josparlanýda.
Aýdanda vedomstvo basshysy Qytaidan kelgen kópbalaly oralman otbasynyń sharýashylyǵymen tanysty.
«Eńbek» baǵdarlamasy boiynsha 4 mln teńge nesie alyp sharýa qojalyǵyn uiymdastyrǵan otbasy tek iri qara men jylqy ósirip qana qoimai, sút ónimderin óndirip, satýmen ainalysada.
Sonymen qatar, elordada B.Saparbaev Saryarqa aýdanynyń halyqqa qyzmet kórsetý ortalyǵynda AÁK-ke ótinishterdi qabyldaý barysymen tanysty. Ol 1 sáýirden bastap áleýmettik kómekti taǵaiyndaý úshin jeke kýálik pen tiisti ótinish berý jetkilikti ekenin taǵy bir márte qujattardy qabyldaityn qyzmetkerlerdiń nazaryna saldy.
«Baiqońyr» aýdany ákimdigine barǵan kezde vedomstvo basshysy ataýly áleýmettik kómekke ótinish berýge kelgen elorda turǵyndarymen kezdesti, Ministr az qamtylǵan azamattarǵa áleýmettik qoldaý kórsetý sharalary boiynsha túsinikteme berdi jáne olardy qyzyqtyratyn suraqtarǵa jaýap berdi.
Elbasynyń tapsyrmasyna sáikes, Qazaqstanda ú.j. 1 sáýirinen bastap AÁK kórsetý mólsheri kúnkóris deńgeiiniń 50% - nan 70% - ǵa deiin kóterilip, 20 789 teńgeni qurady. Nátijesinde járdemaqy alýshylar sany 571,6 myń adamnan 830 myń adamǵa deiin ósedi. Bul rette, eger AÁK-tiń ortasha mólsheri otbasynyń árbir múshesine buryn 4 834 teńgeni quraǵan bolsa, sáýir aiynan bastap ár balaǵa 20 789 tg. tólenedi.
