Sýret: qazaqstan.tv
«Samuryq-Qazyna» qory biyl «Qazaqstan halqyna» qoryna 130 mlrd teńge aýdarady. Bul týraly «Samuryq-Qazyna» qorynyń qoǵammen bailanys, áleýmettik-eńbek qatynasy jáne eńbekti qorǵaý jónindegi basqarýshy direktory Ǵibrat Aýǵanov aitty, dep habarlaidy QazAqparat.
«2022 jyly Samruk-Kazyna Trust qaiyrymdylyq jobalarynyń biryńǵai operatory búkil Qazaqstan boiynsha 43 áleýmettik bastamany júzege asyrǵanyn taǵy bir ret eske sala keteiin. 500 myńǵa jýyq azamatqa kómek kórsetildi. Bul «Samuryq-Qazyna» qory tobynyń qaiyrymdylyqqa bóletin biýdjetin 40 paiyzǵa, iaǵni 10 milliard teńgege deiin arttyrý nátijesinde múmkin boldy. Osy jobalardy júzege asyrý nátijesinde respýblika boiynsha 624 adam jumysqa ornalasty», - dedi Ǵibrat Aýǵanov baspasóz máslihaty barysynda.
Onyń atap ótýinshe, qordyń qaiyrymdylyq is-sharalary biyl da jalǵasatyn bolady.
«Osy jyly da taza paidanyń 7 paiyzyn «Qazaqstan halqyna» áleýmettik qoryna aýdaramyz. Bul soma shamamen 130 mlrd teńgeni quraidy. Iaǵni, qaiyrymdylyqqa bólinetin biýdjet keminde 13 esege ósedi», - dedi qordyń atqarýshy direktory.
