«Samuryq-Qazyna» UÁQ» AQ men Nur-Sultan qalasynyń ákimdigi ózara áriptestik týraly memorandýmǵa qol qoidy. Eki jaq astanada birlesip júzege asyrýǵa baǵyttalǵan birqatar jobalardy talqylady, dep habarlaidy "Ult aqparat".
Memorandým elordaǵa gaz tartý, elektrony saýda, Smart city jobasy, satyp alýlar, áleýmettik sala, import almastyrýdy damytý, poshta jelisi, jastardy qoldaý, HR damytý syndy 9 baǵytty qamtidy.
«Aqyldy qala» (Smart city) baǵdarlamasy Nur-Sultan qalasyn damytýǵa baǵyttalǵan. Atalǵan baǵdarlama aiasynda qalanyń 3 000 podezinde 6 000 baqylaý kamerasy ornatylady.
Nur-Sultan qalasyn gazben qamtamasyz etý máselesi de qaraldy. «Saryarqa» gaz qubyrynyń qurylysyn «Samuryq-Qazyna» UÁQ» AQ qarjylandyrady. Gaz qubyry Qazaqstannyń astanasy men ortalyq, soltústik óńirlerdi kógildir otynmen qamtamasyz etýge baǵyttalǵan.
«10 qazanda «Saryarqa» gaz qubyrynyń qurylysy aiaqtalady. Qala úshin ony daiyndaý ońai emes. Bul mańyzdy máselege ainalady, sondyqtan osy sátten bastap, ózara tyǵyz áreket etip jumys isteý qajet», - dedi A.Esimov.
Sonymen qatar, elektrondy saýda men poshta jelisi taqyryby da qozǵaldy. 2019 jyly franchaizingtiń segiz, 2020 jyly dál osyndai 12 núkte ashý josparlanǵan. Sondai-aq, sálemdemelerdi avtomatty túrde beretin 200 beket ashý josparlanyp otyr.
Memorandýmnyń basym bóligi satyp alýlarǵa, sonyń ishinde jergilikti mańyzdaǵy import almastyrýǵa arnalǵan. Qor uzaq merzimdi kelisim-sharttar jasaý arqyly Nur-Sultan qalasynda jańa óndiris oryndaryn salýǵa baǵyttalǵan jobalarǵa qoldaý kórsetedi. Óz kezeginde astana ákimdigi jańa óndiris oryndaryn qurý jobalaryn, onyń ishinde MJÁ arqyly júzege asyrylatyn jobalardy irikteýdi qamtamasyz etedi. Jańa óndiris oryndaryn qurý jónindegi jobalaǵa 1,6 mlrd. teńge bólindi.
Qor tobynyń satyp alýlaryna qatysýda elordalyq kásipkerlerge qoldaý kórsetý aiasynda «Samuryq-Qazyna» UÁQ» AQ taýarlardy satyp alý men kórsetiletin qyzmetter kólemin 2018 jylmen salystyrǵanda kem degende 10 paiyzǵa ósýin qamtamasyz etpek. 2019 jyly astanalyq kásipkerlerden satyp alýǵa Qor 380 mlrd. teńgege jýyq qarajat bólgen bolatyn.
Sonymen qatar, taraptar Nur-Sultan qalasynyń áleýmettik salasynyń máselelerin talqylady. Qor áleýmettik jetimdiktiń aldyn alý, tserebraldy sal aýrýyna shaldyqqan balalardy ońaltý, balalardy otbasylarda ornalastyrýda zańgerlik kómek kórsetedi. Nur Sultan qalasynda jeńil atletikalyq sport keshenin jáne qazaq drama teatry syndy áleýmettik nysandardy salý úshin 58 mlrd teńge bólindi.
