Almaty qalasynyń №2 qalalyq perinataldyq ortalyǵynyń dárigerleri salmaǵy 740 gramm bolyp týǵan sábidiń ómiri úshin 80 kún boiy kúresti, dep habarlaidy ult.kz.
Sábi shuǵyl kesar tiligi arqyly dúniege kelgen. Júktilik platsentanyń ajyraýy jáne qan ketýmen asqynǵan. Júktiliktiń nebári 26 aptasynda ár gramm men árbir tynystyń mańyzy zor boldy.
Ómiriniń alǵashqy minýttarynan bastap jańa týǵan nárestege qarqyndy meditsinalyq kómek qajet boldy.
«Sábi 40 kún boiy ókpeni jasandy jeldetý apparatynda boldy. Odan keiin taǵy eki aptaǵa jýyq ýaqyt boiy muryn arqyly SIPAP ádisimen tynys alý qoldaýyn aldy», deidi Almaty qalasy №2 qalalyq perinataldyq ortalyǵynyń direktory Svetlana Rahimova.
Jalpy alǵanda, kishkentai patsient jańa týǵan nárestelerdi reanimatsiialaý jáne qarqyndy terapiia bóliminde 56 kún jatty.
Mundai balalar úshin ózdiginen tynys alýǵa kóshý, jaǵdaiynyń turaqtanýy jáne úige shyǵý – naǵyz kúres. Ár kúnniń artynda táýlik boiy baqylaý, nárestelerdi kútip-baptaýdyń zamanaýi ádisteri jáne dárigerler men meditsina qyzmetkerleriniń orasan zor eńbegi tur.
Balanyń jaǵdaiy jaqsarǵannan keiin ol reanimatsiia bóliminen ári qarai kútim jasaý jáne ońaltý úshin tiisti bólimshege aýystyryldy.
Sodan keiin kópten kútken kún de jetti. Ómiriniń 80-táýliginde sábi úiine shyǵaryldy. Salmaǵy nebári 740 gramm bolǵan kishkentai sábi ómiriniń alǵashqy eń kúrdeli kezeńderiniń birinen ótip, naǵyz kishkentai jeńimpazǵa ainaldy.
Búginde Qazaqstan jańa týǵan nárestelerge meditsinalyq kómek kórsetý boiynsha Ortalyq Aziiada jetekshi oryndardyń birin ielenedi.
Dúniejúzilik bank, DDU, IýNISEF, BUU jáne IGME birlesken esebiniń derekterine sáikes, 2025 jyly elimizdegi neonataldyq ólim deńgeii (ómiriniń alǵashqy 28 kúnindegi ólim) 1000 jańa týǵan nárestege shaqqanda 3,04 jaǵdaidy qurady. Bul – óńirdegi eń úzdik kórsetkish jáne AQSh kórsetkishine jýyq.
Zamanaýi perinataldyq tehnologiialar men meditsina qyzmetkerleriniń kásibi sheberliginiń arqasynda sońǵy jyldary shala týǵan nárestelerdiń ómir súrý kórsetkishi tórt esege artty.
