Salqyn ne bolmasa sýyq sýǵa uzaq ýaqyt shomylý paidasyz ári densaýlyqqa qaýipti. Bul týraly QR IIM Tótenshe jaǵdailar komitetiniń tóraǵasy Vladimir Bekker aitty, dep habarlaidy "Ult aqparat".
«Shomylýǵa qatysty birqatar keńes bergim keledi. Salqyn ne bolmasa sýyq sýǵa uzaq ýaqyt shomylýdyń esh paidasy joqtyǵymen qatar densaýlyqqa qaýip tóndiredi. Biz sýdyń temperatýrasyna bailanysty sýǵa shomylý rejimin ustanýǵa keńes beremiz. Sý temperatýrasy +18 gradýs bolǵanda - 6-8 minýt, +20 gradýsta - 10-12 minýt, +20 gradýstan joǵary bolǵanda - 15 minýtqa deiin ǵana shomylý kerek», - dedi komitet basshysy.
Jyl basynan beri oryn alǵan qaiǵyly jaittarǵa toqtalǵan Vladimir Bekkerdiń dereginshe, osy ýaqytqa deiin 62 adamnyń, onyń ishinde 22 balanyń ajaly sýdan bolyp otyr. Onyń ishinde 24 adam - balyq aýlaý kezinde, 13 adam - qatty aǵysqa, iirilmge tap bolyp nemese aiaǵy tartylyp batyp ketken. 10 bala sýǵa qulap jantásilim etse, ishimdik ishken 9 adamnyń ajaly sýdan boldy.
«Ókinishke qarai, elimizde sýǵa ketý deregi joǵary bolyp tur. Eresekterdiń kishkentai balalardy qaraýsyz qaldyratyny alańdatady. Sonyń kesirinen balalar aryqqa, arnaǵa, sý qoimalaryna qulap ketip mert bolady. Ótken táýliktiń ózine 14 adam sýǵa ketse, sonyń altaýy - balalar», - dedi V.Bekker.
