«Sálem, Elorda!» II respýblikalyq óner sherýi óz máresine jetti. QR Ulttyq kitaphanasynda ótken otyrysta óner sherýiniń jetistikteri qorytyndylandy, dep habarlaidy "Ult aqparat".
Jiynda vitse-ministr Nurǵisa Dáýeshov óńirlerdiń ózara qarym-qatynasyn arttyra túsetin «Sálem, Elorda» syndy respýblikalyq sharalardyń aýqymyn keńeitip, halyqaralyq deńgeige jetkizý qajettigin atap ótti.
«Joba aiasynda óńirlerden kelgen mádeniet qyzmetkerleri ózara tájiribe almasyp, sheberlikterin shyńdady. Bul sharalar elimizdiń túpkir-túpkirinen jinalǵan áriptesterimiz úshin múmkindikter alańyna ainalyp, olardyń rýhani tolysýyna septigin tigizdi», - deidi vitse-ministr.
QR Mádeniet jáne sport ministrliginiń bastamasymen júzege asyrylǵan «Sálem, Elorda!» óner sherýi biyl oflain formatta Almaty oblysy men Almaty qalasyndaǵy óner uiymdarynda ótti.
Festivaldiń maqsaty – óńirlerdiń óneri men mádeni jetistikterin keńinen nasihattap, ozyq úlgidegi oryndaýshylardy dáripteý.
Sonymen birge, óner sherýi aiasynda ulttyq qundylyqtar ulyqtalyp, el Táýelsizdiginiń 30 jáne Jambyl Jabaevtyń 175 jyldyǵy sekildi biyl respýblikalyq mańyzy bar mereitoilar men jergilikti ataýly datalardy qamtyldy.
Jobany «Qazaqkontsert» memlekettik kontsert uiymy» janyndaǵy «Respýblikalyq kontserttik-gastroldik qyzmet ortalyǵy» úilestirýde.
Osy oraida Qazaqkontsert basshysy Jeńis Seidýllauly óz sózinde osyndai iri jobalardy tek úlken qalalarda ǵana emes, óńirlik mádeniet uiymdarynda da ótkizý mańyzdy ekenin aitty.
«Biylǵy «Sálem, Elorda!» óner sherýine 20 óńirlik mádeniet uiymy qatysty.
Joba barysynda áriptesterimizge túrli baǵyttaǵy kásibi sheberlik synyptary, tanymdyq máni zor is-sharalar men ozyq úlgidegi kontserttik baǵdarlamalar usynyldy. Óner sherýi aiasynda 22 shara, onyń ishinde 9 master-klass, seminar-treningter men praktikým sabaqtar ótti. Sheberlik synyptarynda mádeniet salasyndaǵy menedjment, mýzykalyq teatrlardaǵy rejissýranyń ereksheligi, dybys jáne jaryq operatorlarynyń qyzmeti, HR máseleleri syndy taqyryptar qamtyldy. Óner sherýi endi jyl sońynda Táýelsizdiktiń 30 jyldyq mereitoiyna orai Nur-Sultan qalasynda ótetin gala-kontsertpen aiaqtalady»,- dep atap ótti Jeńis Seidýllauly.
«Sálem, Elorda!» II respýblikalyq óner sherýi estrada juldyzdary men óńir ónerpazdarynyń qatysýymen ótken «Asqaqta, armandardyń Alataýy!» atty gala-kontsertpen aiaqtaldy.
