Búgin Densaýlyq saqtaý ministri Aleksei Tsoi QR Prezidenti janyndaǵy Ortalyq kommýnikatsiialar qyzmetinde ótken brifingte sóz sóiledi. Onyń barysynda jurtshylyq pen BAQ-ty halyqty KVI-ǵa qarsy vaktsinatsiialaý jáne revaktsinatsiialaý týraly habardar etti, sondai-aq «Salaýatty ult» Ulttyq jobasynyń negizgi baǵyttaryn atap ótti, dep habarlaidy "Ult aqparat".
Óz sózinde Tsoi ministrliktiń KVI-ǵa qarsy vaktsinalardy satyp alý boiynsha júrgizip jatqan jumysy, profilaktikalyq egýlerdiń Ulttyq kúntizbesine sáikes halyqty vaktsinamen basqarylatyn aýrýlardan josparly immýndaý týraly aityp berdi. Sondai-aq, azamattardyń KVI-ǵa qarsy revaktsinatsiiasy boiynsha tásilder týraly habardar etti.
«Memleket basshysynyń Joldaýda aitylǵan sanitarlyq-epidemiologiialyq qyzmetti nyǵaitý jáne otandyq dári-dármek óndirisin damytý jónindegi tapsyrmalary «Salaýatty ult» árbir azamat úshin sapaly ári qoljetimdi densaýlyq saqtaý» Ulttyq jobasynda kórinis tapqanyn atap ótý qajet. Ulttyq joba jalpyulttyq basymdyqtar siiaqty elimizdiń strategiialyq qujattaryn eskeredi: Qazaqstan Respýblikasynyń 2025 jylǵa deiingi ulttyq damý jospary; Nur Otan partiiasynyń «Ózgerister joly: árkimge laiyqty ómir!»,- dedi Tsoi.
Densaýlyq saqtaý ministrliginiń basshysy Ulttyq joba QR Densaýlyq saqtaýdy damytýdyń memlekettik baǵdarlamasynyń quqyqtyq mirasqory bolyp tabylatynyn jáne 2025 jylǵa deiin naqty, qol jetkizýge bolatyn mindetterdi qamtitynyn atap ótti. Sonymen qatar, ministrlik salanyń uzaq merzimdi perspektivalary men operatsiialyq qyzmetin kórsetetin densaýlyq saqtaýdy damytý tujyrymdamasyn ázirleýde.
Jalpy ulttyq joba meditsinalyq kómektiń qoljetimdiligi men sapasyn arttyrýdy; epidemiologiialyq boljaý men den qoiýdyń qazirgi zamanǵy júiesin qalyptastyrýdy; otandyq farmatsevtika salasyn damytýdy; salamatty ómir saltyn ustanatyn halyqtyń úlesin ulǵaitýdy jáne buqaralyq sportty damytýdy qamtityn 4 baǵyttan turady.
Ár baǵyt boiynsha mindetter men nátijeler kórsetkishteri belgilengen. Ulttyq jobany iske asyrý meditsinalyq kómektiń qoljetimdiligin arttyrýǵa, júkti áielderdiń densaýlyǵyn saqtaýǵa jáne balalardyń densaýlyǵyn nyǵaitýǵa, múmkindikteri shekteýli balalardy ońaltýmen qamtýǵa, kadr áleýetin nyǵaitýǵa yqpal etetin bolady. Sondai-aq, ulttyq joba epidemiologiialyq qyzmetti jetildirý, otandyq farmatsevtikalyq ónerkásipti damytý jáne salaýatty ómir saltyn yntalandyrý jónindegi sharalardy iske asyrýǵa baǵyttalǵan.
