Túrkistan oblysy ákiminiń orynbasary Sáken Qalqamanov Arys qalasyna qarasty Naýryz shaǵynaýdanynyń turǵyndaryn qaýipsiz aýmaqqa kóshýge shaqyrdy, dep habarlaidy "Ult aqparat".
Sáken Qalqamanovtyń Facebook paraqshasyndaǵy málimetterge qaraǵanda, órtengen vagondarda 33 tonna sary fosfor bolǵan. Qazirgi tańda órt oqshaýlandy, alaida órtengen aýmaqtan áli tútin shyǵyp jatyr. Tútin Arys qalasynyń Naýryz shaǵynaýdanyna qarai tarap jatyr.
Sáken Qalqamanov sary fosfordyń qaýpine bailanysty jergilikti turǵyndardy aimaqtan qaýipsiz jerge ketýge shaqyrdy.
«Qazir biz Naýryz aýdanyndaǵy aýlalardy aralap, turǵyndardy qaýipsiz jerge ketýge shaqyryp jatyrmyz. Sary fosfordyń tútini óte qaýipti. Sondyqtan Arys turǵandaryn bilik ókilderiniń ótinishin nazarǵa alyp, densaýlyǵy men jaqyndaryn saqtandyrýǵa shaqyramyn», - dedi ákimniń orynbasary.
Aita keteiik, búgin Arys stantsiiasynda shamamen keshki saǵat 18:30-dar shamasynda Jambyl oblysynan Reseige jóneltilgen fosfor salynǵan eki konteiner órtendi.
Oblys ákimi baspasóz qyzmetiniń habarlaýynsha, tirkemede barlyǵy 64 vagon bolǵan.
Tótenshe jaǵdaimen kúreske 35 qyzmetshi, TJD-niń 6 tehnikasy, 11 jumysker, 1 dana tehnika men «QTJ» UK» AQ-nyń órt sóndirý poiyzy jumyldyrylǵan. Sondai-aq osy jumystarmen politsiianyń 60 qyzmetkeri men 9 tehnikasy, 8 áskeri qyzmetshi men Qorǵanys ministrligi 4489 áskeri bóliminiń 2 tehnikasy qatysyp jatyr. Oǵan qosa sanitarlyq-epidemiologiialyq baqylaý basqarmasynyń 3 qyzmetshisi men 1 tehnikasy bar.
