Belgili saiasattanýshy, Qazaqstan Respýblikasy Parlamentiniń Májilis depýtaty, Nur Otan fraktsiiasynyń múshesi Erlan Sairov óziniń Facebook paraqshasynda Qazaqstan Respýblikasy Tsifrlyq damý, innovatsiialar jáne aeroǵarysh ónerkásibi ministri Baǵdat Mýsinge joldaǵan depýtattyq saýalyn jariialady.
Ministrge qoiylǵan saýalda elimizdegi elektrondy úkimetti reseilik «Sber» platformasyna aýystyrý máselesi kóterilgen. Depýtat E.Sairov atalǵan bastama qoǵam tarapynan qyzý talqylanyp jatqanyn jetkizip, eldi alańdatatyn suraqtarǵa jaýap berýdi surady.
«... kelesi suraqtarǵa jaýap berýińizdi ótinemin!
1. Nelikten Qazaqstan Respýblikasynyń sandyq transformatsiiasy salasyndaǵy jumysqa «Sberbank» seriktestigimen memorandýmǵa qol qoiyldy?
1.1. Nelikten, bank tóraǵasy qol qoiǵan mundai qujatqa Qazaqstan Respýblikasynyń Premer-Ministri qol qoiýy tiis? Ministr nemese «Azamattarǵa arnalǵan Úkimet» basshysynyń deńgeii emes pe?
2. Osy másele boiynsha Qazaqstan Respýblikasy seriktes bolý úshin jahandyq deńgeide lider iri kompaniialarmen kelissózder júrgizildi me?
3. Atalǵan joba is-júzine asqan kezde, aqparattyq qaýipsizdik normalary qalai qadaǵalanady, azamattardyń derekter bazasy qai jerde saqtalady, bul bazaǵa shet el azamattarynyń kirý, kórý erkindigi bola ma?
4. Alty jylda memlekettik «Ulttyq aqparattyq tehnologiia» AQ 860 mlrd astam qarjy bólingen. Sonymen birge, barlyq memlekettik organdar, kvazi memlekettik sektor, eshqandai qyzmetin kórmesede, osy kompaniiamen kelisim-shartqa otyrýy tiis degen aqparatta bar. Osynshama qarjy bóline otyryp nelikten azamattar syrtqy-ishki qoldanýshy retinde, úzilissiz, kedergisiz jumys isteitin ulttyq servis alańyn jasai almadyq?
5. Arhiv salasyn tsifrlandyrýǵa 1,2 mlrd teńge bólingen eken, osy sharýa nege aiaqsyz qalǵan, qarjy qaida? Azamattar eń kóp qoldanatyn jerdik kadastr salasy nelikten áli kúnge deiin tsifrlandyrylmaǵan?
Bizdiń oiymyzsha, halyq, qoǵam aldynda tsifrovizatsiia salasyndaǵy jaǵdai jóninde esep beretin ýaqyt jetti!», – dedi sóziniń sońynda depýtat.
Esterińizge salsaq aldyńǵy aptada Tsifrlyq damý, innovatsiia jáne aeroǵarysh ónerkásibi ministri Baǵdat Mýsin elektrondy úkimetti reseilik «Sber» platformasyna aýystyrý boiynsha josparymen tanystyrdy. Osy jobaǵa shamamen 500 million dollar qajet ekendigi belgili boldy.
