Ortalyq sailaý komissiiasynyń múshesi Lázzat Súiindik daýys berý qarsańynda jáne daýys berý kúni saqtalýy tiis negizgi erejeler týraly aityp berdi, dep habarlaidy ult.kz.
22 tamyz - tynyshtyq kúni. Bul kúni jáne daýys berý kúni sailaý aldyndaǵy úgit júrgizýge tyiym salynady. Buǵan deiin ornalastyrylǵan úgit materialdary, sonyń ishinde internettegi materialdar, burynǵy oryndarynda qala beredi. Alaida olardy internet-resýrstardyń basty betterinde qaita ornalastyrýǵa bolmaidy.
Saýalnamalar men boljamdardy jariialaýǵa qatysty da arnaiy shekteýler belgilengen. Daýys berýge deiingi bes kún ishinde jáne daýys berý kúni qoǵamdyq pikirge saýal salý nátijelerin, sailaý nátijeleriniń boljamdaryn jáne sailaýǵa bailanysty ózge de zertteýlerdi taratýǵa jol berilmeidi.
Bul rette daýys berý kúni exit poll saýalnamasyn tek daýys berý úi-jailarynan tys jerde jáne bul týraly OSK-ny habardar etken uiymdar ǵana júrgize alady.
«Qazaqstan Respýblikasyndaǵy sailaý týraly» Konstitýtsiialyq zańnyń 27-babyna sáikes, daýys berý kúni toltyrylǵan biýlletenniń foto jáne (nemese) beinetúsirilimin júzege asyrýǵa jáne ony taratýǵa tyiym salynady. Bul rette sailaýshynyń sailaý ýchaskesinde fotoǵa túsý quqyǵyna shekteý qoiylmaidy. Sailaýshynyń qai partiiaǵa daýys bergeni kórinbeitin bolsa, sailaý jáshiginiń janynda nemese biýlletendi jáshikke salý kezinde de fotoǵa túsýge bolady. Daýys berý kúninen keiin mundai materialdardy taratýǵa qatysty tyiym qoldanylmaidy, óitkeni bul shekteý dál daýys berý kúnine qatysty belgilengen», – dep atap ótti Lázzat Súiindik.
Baiqaýshylar men buqaralyq aqparat quraldary ókilderiniń jumysyna da erekshe nazar aýdaryldy. Olar sailaý ýchaskelerinde bolýǵa jáne zańnamada belgilengen ókilettikteri sheginde daýys berý barysyn baqylaýǵa quqyly. Bul rette baiqaýshylarǵa sailaý jáshikterin, sondai-aq jasyryn daýys berýge arnalǵan kabinalardyń kiretin jáne shyǵatyn tusyn baiqaý múmkindigi qamtamasyz etilýge tiis.
Sailaý protsesiniń barlyq qatysýshylary ýchaskede belgilengen tártipti saqtaýǵa jáne azamattardyń erkin erik bildirýne kedergi keltirmeýge mindetti.
