Almaty ákimi Baqytjan Saǵyntaev sel qaýpine bailanysty ún qosqan halyqqa alǵys aitty, dep habarlaidy QazAqparat.
«Tańerteń QR IIM habarlasyp, eger qiyn jaǵdai bolatyn bolsa, halyqty kóshirý kerek degen oi boldy. 2015 jylǵydai ózen arnasynan tasyp, tastar men laily sý aǵatyn bolsa, tazalaý kerek bolady dep Uzynaǵashtan qosymsha áskeri kúshter shaqyrttyq. Sarbazdar, Ulttyq ulan sarbazdary kúrekterin ustap saqadai sai tur. Halyq alańdap jazyp jatyr. Eriktiler alańdaýly. Qandai kómek jasaiyq, ne isteiik dep jatyr. Osyndai qiyn jaǵdaida aýyzbirshilik bolǵany jaqsy. Almatylyqtar osy aýyzbirshiliktiń úlgisin kórsetip jatyr. Myń da bir rahmet bárine. Ázirge mamandar ózderi atqaryp jatyr», - dedi Baqytjan Saǵyntaev.
Qala ákimi halyqpen suhbattan eshqashan qashpaitynyn jetkizdi.
«Men - árkezde ashyqpyn. Kezdesýden qashý, dialogtan qashý degen joq. Usynystaryńyz bolsa aityp, áleýmettik jelide akkaýntqa jazyp otyryńyzdar. Onyń bári oqylyp jatyr. Júie-júiege bólinip, tapsyrma berilip, qaralyp jatyr. Aitylǵan sózdiń bári bos ketip jatyr dep oilamańyzdar. Qalanyń damýyna órkendeýine, aýdandardaǵy keibir kemshilikterin kórmei jatqan jerdi kóz jetkizip aityp otyrýǵa ol da jaqsy. Ákimderge ashyq alań ornatyp apta saiyn kezdesý tapsyrylǵan», - dedi ákim.
Aita ketý kerek, búgin Almatyda Naýryzbai aýdanynda az mólsherde sel júrgen bolatyn. TJD ókilderi halyqty qulaqtandyryp úlgerdi.
