Úkimet basshysy Baqytjan Saǵyntaev baǵanyń negizsiz ósýine jol bermeý jumystarynda ákimdikterdiń qadamdaryn synǵa aldy. Bul týraly QazAqparat jazdy.
«Árine, birinshi kezekte biz baǵanyń negizsiz óspeýin baqylap otyrýymyz kerek. Maýsymdyq jáne basqa da sebeptermen taýar qunynyń joǵarylaýy oryn alady, biraq ta baǵaǵa qatysty tiisti sheshimder jasalǵanymen, kóp jaǵdailarda jumystardyń atqarylmaýy saldarynan ósip jatady. Bizde óndiristi jáne ónimniń saýdasyn iske asyrýdy yntalandyrýǵa bailanysty, baǵany yryqtandyrýǵa tetikter jetkilikti. Alaida, bul tetikter jumys istemei tur. Otyrysta baiqaǵanymyzdai, jergilikti jerlerde ákimdikter tarapynan qadaǵalaý bolmai tur»,-dedi Premer-Ministr Úkimet otyrysynda.
Osy rette B. Saǵyntaev baǵany yryqtandyrýda júieli sharalar qabyldaý kerektigin qadap aitty.
«Bizdiń keibir áripstesterimiz laýazymdaryn alǵannan keiin bazarlarǵa baryp, baǵalardy inspektsiialap jatady. Degenmen de olar barǵan kezde, bazarlarda taýarlar men ónimder baǵasyn saýdagerler lezde tómendetip tastaitynyn óte jaqsy biledi. Olar ketkennen keiin saýdagerler eski baǵany qaita qoiady. Bul óz kezeginde bedelqumarlyqtan basqa eshteńeni bermeidi. Sondyqtan naqty qajetti júieli sharalardy júzege asyryńyzdar»,-dedi ol.
Bul turǵyda Úkimet basshysy Qazaqstanda óndiriletin ónimder boiynsha baǵany ustap turýǵa tolyq negiz bar ekenin jetkizdi. Sonymen qatar B. Saǵyntaev QR Ulttyq ekonomika ministrligine baǵa saiasatynda rettegish tetikterdi tiisti deńgeide paidalanýdy eskertti.
