Almaty ákimi Baqytjan Saǵyntaev qala aktiviniń otyrysynda, kásipkerlikti qoldaýdyń naqtyly sharalaryn túsindirdi, dep habarlaidy QazAqparat.
Ákimniń aitýynsha, eń aldymen, mádeniet, týrizm, kólik, logistika jáne IT-innovatsiia salalarynda kásipkerlikti damytýǵa nazar aýdarylady.
«Otbasylyq biznesti, sonyń ishinde kópbalaly otbasylardyń kásipkerlikpen ainalysýyna erekshe mán beriledi. Sondyqtan Almatyda «Baqytty otbasy» kópbalaly otbasylardy qoldaý ortalyǵynda áielderdi kásipkerlikke úiretetin «Isker Ana» baǵdarlamasy qolǵa alyndy.
Múmkindigi shekteýli jandar úshin olardyń jumys oryndarynda tálimgerlik pen tájiribe jinaqtaý ortalyǵyn ashý josparda. Bul igi bastama jyl sońyna deiin iske asady», - dedi Baqytjan Saǵyntaev.
Onyń aitýynsha, kásipkerlikke jaǵdai jasaý jáne ákimshilik kedergilerdi azaitý maqsatynda Almatynyń alty aýdanynda «Qoldaý» kásipkerlik ortalyǵy qurylǵan. Munda barlyq memorgandardyń, damý institýttary men monopolisterdiń mamandary qyzmet kórsetetin bolady.
«Basty mindet – jergilikti kásipkerlerge qoldaý kórsetý.Memlekettik organdar ózderiniń qajettilikterine bizdiń kásipkerler shyǵaratyn ónimderdi alýlary tiis»,- dep atap ótti B. Saǵyntaev.
Aita keterligi, Almatyda ShOB sýbektileriniń sany - 185 myń. Olar qalanyń JIÓ 40%-yn, salyqtyń 64%-yn qamtamasyz etedi, olar 600 myńnan astam jumys ornyn ashqan.
