Almaty qalasynyń ákimi Baqytjan Saǵyntaev almatylyqtar onyń jeke qabyldaýyna nelikten kire almai júrgenin túsindirdi, dep habarlaidy QazAqparat tilshisi.
«Jeke qabyldaýyma qatysty aitsam, men kezdesken barlyq aýdan turǵyndary jeke qabyldaýyma kire almai jatqandaryn alǵa tartady. «Qońyraý shaldyq, jazyldyq», - deidi. Buǵan ákimdik qyzmetkerleri kináli emes. Eki ai boiy eshkimdi qabyldamaitynymdy ózim aittym. Óitkeni, eń aldymen, turǵyndarmen ózim baryp kezdesýdi jón kórdim. Óz kózimmen kórip, turǵyndardy tyńdaǵym keldi. Qyrkúiek aiynan bastap, aiyna eki ret qabyldaý ótkizemin. Bir ret ákimdikte, ekinshi ret «Nur Otan»-da qabyldaityn bolamyn», - dedi Baqytjan Saǵyntaev Almaty qalasy Bostandyq aýdanynyń turǵyndarymen kezdesýde.
Aita ketý kerek, jinalysqa kelgenderdiń basym bóligi, ákimnen olardy jeke qabyldaýdy ótindi. Olardyń barlyǵy qyrkúiek aiynda ákim qabyldaýyna shaqyrylady.
