Almaty qalasynyń ákimi Baqytjan Saǵyntaev búgin jumys saparymen Alataý aýdanyn aralady, dep habarlaidy "Ult aqparat".
Megapolis basshysy birqatar áleýmettik mańyzdy nysandar jumysymen tanysty. Olardyń basym bóligi «Jumyspen qamtýdyń jol kartasy» baǵdarlamasy aiasynda júzege asyrylyp jatyr.
«Infraqurylymdy jaqsartý boiynsha biraz jumys atqarylyp jatyr. «Uljan» yqshamaýdanyndaǵy Jalaiyr kóshesiniń boiynda uzyndyǵy 2 shaqyrym bolatyn jol jóndelýde. Búginde aýdannyń toǵyz yqshamaýdanynda 84 shaqyrymǵa jetetin jańa jol salynýda. Segiz yqshamaýdanda uzyndyǵy 67,4 shaqyrym jolǵa ortasha jóndeý jumystary júrgizilýde. Sondai-aq, turǵyndardyń ótinishteri boiynsha ótken jyly sý qubyry men káriz jelileriniń qurylysy bastaldy», –dep jazdy qala ákimi Instagram -daǵy paraqshasynda..
Sonymen qatar, ol «Nurly jer» baǵdarlamasy boiynsha salynyp jatqan «Alataý Siti» turǵyn úi keshenine bardy.
«Qurylys júrgizýshiler MJÁ aiasynda qalaǵa 350 orynǵa arnalǵan balabaqsha salyp beredi. «Jumyssyzdyqpen qamtýdyń jol kartasy» boiynsha úsh jasyl aimaq, úsh skver jáne alty jaiaý júrginshiler aimaǵy jóndelýde. Rysqulov dańǵyly, «Alataý» teatry aldyndaǵy aýmaqta, «Qarasý» yqshamaýdanyndaǵy rekreatsiialyq aimaqta júrgizilip jatqan jumystar men materialdardyń sapasyn tekserdim. Bos aýmaqtardy barynsha kógaldandyrýdy tapsyrdym», - dep atap ótti Baqytjan Saǵyntaev.
